Қирғизистондаги барча тўй ва оммавий сайилларни тўхтатиш таклиф этилди. Бу ҳақда Қирғизистон бош вазири Қубатбек Бўронов махсус брифингда маълум қилган.
Ҳукумат раҳбарининг сўзларига кўра, оммавий тадбирлар коронавирус инфекциясининг қайта тарқалишига сабабчи бўлиши мумкин.
«Август ойидан Янги йилгача бўлган оралиқда тўйлар ўтказилиши одат тусига кирган. Мен ҳам бошқа қирғизистонликлар каби шу кунларга режалар қилгандим, бу бизнинг тарихий анъанамизга айланиб қолган. Аммо айни вақтда дори-дармон етишмовчилигидан қийналмоқдамиз ва шунинг учун тўйлар қилишни вақтинча тўхтатишни сўрайман. Маҳаллий ўз-ўзини бошқариш органлари, Бишкек ва Ўш шаҳарларининг маъмуриятлари доимий равишда рейдлар ўтказмоқда. ОАВда текширувлар ўтказилаётгани, зиёфатларни ўтказганларга жарималар белгилангани ҳақида хабарлар берилмоқда. Ҳукумат бу борада кучайтирилган тартибда ишламоқда ва сиздан мазкур вазиятни тўғри тушунишингизни сўрайман», — деган Қубатбек Бўронов.
Қирғизистон Вазирлар маҳкамасининг раҳбари айни вақтда мамлакатда коронавирус билан боғлиқ вазият ижобий томонга ўзгараётгани, бироқ чекловларга амал қилинмаса, ҳолат яна оғирлашиши мумкинлиги юзасидан хавотирлар мавжуд эканини қўшимча қилган.
Қирғизистонда коронавирус эпидемияси бошланганидан буён 2020 йил 19 август ҳолатига кўра, жами 42 325 та касалланиш ҳолати қайд этилган, 35 197 киши касалликдан тузалган ва 1054 нафар бемор инфекция асоратлари оқибатида вафот этган.
Изоҳ (0)