АҚШнинг Калифорния штатида ўрмон ёнғинлари сабабли фавқулодда ҳолат режими жорий қилинди. Олов 39 та участкада тарқалган, улар орасидаги энг каттасининг майдони 14 минг гектарни ташкил қилмоқда. Ёнғинларнинг юзага келишига аномал иссиқ ва чақмоқлар сабаб бўлган. «РБК» ўрмон ёнғинлари акс этган фоторепортажни тақдим этди.
Майдони тахминан 13 минг гектарни ташкил қилган энг йирик ёнғин Напа шаҳрида авж олмоқда. Берриэсс сув омбори яқинидаги бир нечта уй ёниб кетган.
Калифорниядаги «Ўлим водийси» миллий боғида 17 август куни кузатувлар давомидаги энг юқори ҳарорат — 54,4 даража иссиқ қайд этилган.
Чўлдаги бундай юқори ҳарорат оловли торнадоларни ҳосил қилади, улар эса ёнғинларни келтириб чиқаради.
Бир қанча ҳудудларда, масалан, Баллс-Каньон ёки Аламида шаҳрида мажбурий эвакуация эълон қилинган.
Ҳозирча ёнғинни ўраб олишга муваффақ бўлинмаган. Ёниб кетган уйларнинг сони номаълум, жабрланганлар ҳақида хабар берилмаган.
Эслатиб ўтамиз, 2019 йил сентябридан 2020 йил март ойигача Австралияда ўрмон ёнғинлари содир бўлган ва уларнинг оқибатида 34 нафар одам ҳалок бўлган. Мазкур ёнғин мавсуми Австралия тарихида ҳали кузатилмаган энг ёмон даврлардан бири бўлган. Австралиядаги ўрмон ёнғинларида нобуд бўлган ва талафот кўрган жониворлар уч миллиард атрофида экани маълум бўлди. Австралия ҳукумати ўрмон ёнғинлари оқибатларини бартараф этиш учун 1,4 миллиард доллар ажратишга қарор қилди.
Изоҳ (0)