Буюк Британияда қўшиқчи Кети Прайсга тегишли Barbie услубидаги Suzuki Vitara моделига харидор чиқмаяпти. Машина бир йил олдин сотувга қўйилган, бироқ сотувчи ҳақоратли изоҳлар сабаб эълонни олиб ташлаган. Ижтимоий тармоқларда йўлтанламасни «пушти мажруҳ» деб атай бошлашган, деб ёзади Motor.
Сўнгги йилларда пушти Vitara Прайснинг собиқ қайлиғининг қариндошлари уйи подъездидаги йўлакда ётган — қўшиқчи машинани ташлаб кетган ва уни қайтариб олиб кетишга келмаган. Яқинда «барбимобил»нинг норози эгалари уни эвакуатор ёрдамида Кети Прайснинг Суссексдаги уйига юбориб, муаммони ўзи ҳал этишини талаб қилган. Бироқ машҳур қўшиқчи автомобилни таъмирламаса керак, чунки 2019 йилда у банкротликка учраган ва маст ҳолда машина ҳайдагани учун ҳайдовчилик гувоҳномасидан айрилган.
2002 йилда ишлаб чиқарилган Suzuki Vitara модели Vatel Magic фирмаси томонидан «барбимобил»га айлантирилган. Йиғма матоли томга эга уч эшикли йўлтанламасга Barbie логотипи туширилган ёрқин пушти винил плёнка қопланган, худди шу рангдаги дискалар ўрнатилган, ўриндиқларга эса сунъий тери тортилган. Кейинроқ Vatel Magic Прайсни бартер шартномасини бажармаганлиги учун судга берган.
2019 йилда «пушти мажруҳ»ни eBay орқали сотишга уринишган. Vitara нархи 1,5 минг фунтга баҳоланган, бироқ ўша вақтда ҳам машина жиддий таъмирталаб бўлган. Савдолар вақтида унинг нархи 66 минг фунтга қадар кўтарилган, аммо сотувчи салбий изоҳ ва баҳолар сабаб аукцион якунланишини кутмай, эълонни олиб ташлаган.
The Sun маълумотларига кўра, ҳозирда «барбимобил»ни қайта тиклаш учун камида 5 минг фунт керак бўлади, бироқ машина энди ҳеч кимга керак эмас.
Изоҳ (0)