АҚШ президенти Дональд Трамп Беларусда юзага келган вазиятни «даҳшатли» деб атади. Бу ҳақда Reuters хабар берди.
Трампнинг сўзларига кўра, АҚШ юз бераётган воқеаларни диққат билан кузатмоқда. АҚШ давлат котиби Майкл Помпео 17 август, душанба куни Вашингтон Европа Иттифоқи билан биргаликда «Беларусь халқига суверенитет ва эркинликка эришишда ёрдам бериш» истагида эканлигини маълум қилган.
Европарламент депутатлари 17 август куни Александр Лукашенкони Беларуснинг қайта сайланган президенти сифатида тан олмаслигини маълум қилган ва унга Европа Иттифоқидаги Persona non grata мақомини берган. Шунингдек, Буюк Британия ҳукумати Беларусда бўлиб ўтган сайлов натижаларини тан олмаслигини эълон қилди.
Александр Лукашенко Беларуснинг янги конституция қабул қилинганидан кейин мамлакатда сайловлар қайта ўтказилиши мумкинлигини айтди.
Аввалроқ Еврокомиссия иттифоқ мамлакатларни Минскка қарши санкциялар қўллашга тайёр деб баҳолаётгани ҳақида хабар берилганди. БМТ бош котиби эса Беларусда сайловлардан кейин юзага келган можарони мулоқот орқали ҳал қилишга чақирди.
Изоҳ (0)