Бугун – Беларусда 9 августдан буён давом этаётган норозилик намойишларининг тўққизинчи куни. Бугунги кун қандай кечди? Қуйида шу ҳақда сўз юритамиз.
Мавзуга доир:
«Тугатдим, энди ‘кет’ деб бақираверинглар»
Бугун ҳам ҳар доимгидек беларуслар эрта тонгдан намойишга чиқди.Шунингдек, мамлакат президенти Александр Лукашенко Минскдаги бир қатор заводларга ташриф буюриб, у ердаги ишчилар олдида чиқиш қилди.
Дастлаб, Минскдаги шатакли трактор заводига (МЗКТ) ташриф буюрган. Ишчилар уни «Кет!» деган ҳайқириқлар билан кутиб олди. Ишчилар олдида нутқ қилган Лукашенко янги сайлов ўтказилмаслигини, ўтказилса ҳам унинг ўлимидан сўнг ўтказилишини айтди.
Мазкур заводдаги учрашувдан сўнг у машҳур МАЗ заводига борди ва у ерда ҳам ҳокимиятдан кетмаслигини маълум қилди. Қуйида унинг заводларда сўзлаган нутқларидан баъзи иқтибосларни эътиборингизга ҳавола этамиз.
«Беларусь заводлари ‘баъзилар адашиб юришганига қарамай’, ишламоқда. Хўш, 150-200 киши об-ҳавони ўзгартира олмайди. Ким ишлашни хоҳламаса ва кетишни истаса, марҳамат, эшиклар очиқ» («Кет!», қичқиради ишчилар).«Раҳмат, сиз яна бақиришингиз мумкин». «Сиз ишчиларсиз, сиз доимо президентни қўллаб-қувватладингиз» («Йўқ!»). «Биласиз, аввало сиз биласизки...» («Ёлғон! Кет!»).
«Сиз адолатли сайлов ўтказишни хоҳлайсиз, аммо «мени ўлдирмагунингизча бошқа сайлов бўлмайди».
«Мен босим остида бирор нарса қилишимни ҳеч қачон кутманг».
«Агар Беларусда Конституция ўзгарса, мен президентлик ваколатларини топширишга тайёрман, лекин босим остида эмас».
«Энди Окрестина кўчасидаги изоляторда калтакланганлар ҳақида: Тўғри. Аммо улар қилмишларига яраша, ментларга ташланганлари учун жазоларини олди». («Йўқол!» Одамлар ҳуштак чалади).
«Раҳмат. Мен ҳаммасини айтдим». ‘Йўқол!’ деб бақиришингиз мумкин («Йўқол!»).
«Миллат лидери бўлишга тайёрман»
Бугун Беларусдаги сайловда Александр Лукашенконинг асосий рақиби бўлган Светлана Тихановская яна бир видеомурожаат йўллади. Унда миллат лидери бўлишга тайёрлигини билдирди.Мен бу мураккаб даврда мамлакат тинчланиши, нормал ритмга тушиши учун барча сиёсий маҳбусларни озод қилишимиз ва имкон қадар қисқа вақт ичида янги президент сайловларини ўтказиш учун қонунчилик базаси ва шарт-шароитларини тайёрлаш учун миллат лидери сифатида масъулиятни олишга ва бу йўлда ҳаракат қилишга тайёрман.Светлана Тихановская
Persona non grata
Европа парламентининг етакчи партиялари раҳбарлари Беларусда янги президентлик сайловини ўтказишга, тинч намойишчиларга қарши зўравонлик ҳолатларини тергов қилишга ва сиёсий маҳбусларни озод қилишга чақирди. Бу ҳақда European People’s Party хабар қилди.
«Биз Беларусь халқини жасурлиги ва қатъияти учун олқишлаймиз ва уларнинг демократик ўзгариш ва озодликка бўлган интилишини қўллаб-қувватлаш учун қўлимиздан келганини қиламиз. 9 август куни бўлиб ўтган президент сайловлари на эркин, на адолатли бўлди. Ишончли ҳисоботлар Светлана Тихановскаянинг ғалабасидан далолат беради. Шунинг учун биз Александр Лукашенкони Беларуснинг қайта сайланган президенти сифатида тан олмаймиз ва уни Европа Иттифоқида persona non grata деб биламиз», — дейилади томонлар қўшма баёнотида.
Европа парламенти вакиллари Россия расмийларини Беларусь ишларига яширин ёки ошкора ҳар қандай аралашувдан тийилишга чақирди, шунингдек, Европа Иттифоқига аъзо давлатлардан Россиянинг ушбу йўналишдаги ҳар қандай ҳаракатларига қарши чиқишни сўради.
Элчимизни чақирамиз
Украина Ташқи ишлар вазирлиги Минскдаги элчисини маслаҳат учун чақириб олади. Бу ҳақда Украина ТИВ раҳбари Дмитрий Кулеба маълум қилди.«Биз тарихда биринчи марта Беларусь билан муносабатларда бундай қадамни қўйдик ва биз буни Минскнинг номақбул ҳаракатлари туфайли қиляпмиз», деди Кулеба.
Изоҳ (0)