Xiaomi геймерлар учун ҳамёнбоп Redmi G ноутбугини тақдим этди

Хитойнинг Xiaomi компанияси геймерлар учун Redmi G номли ноутбугини тақдим этди, деб хабар беради «Hi-Tech.Mail.ru».

Redmi G’нинг ўзига хослиги — Full HD сифат ва янгиланиш частотаси 144 герцга тенг 166 дюймли дисплейида. Ушбу кўрсаткич экрандаги тасвир сониясига қанча янгиланишини кўрсатади — герцлар сонининг кўплиги тасвир тиниқлигини билдиради. Шунингдек, ноутбукнинг 60 герцли экранга эга версияси ҳам тақдим этилган.

Барча модификациялардаги экранлар ёруғлиги 300 нитни ташкил этади, sRGB рангли маконнинг қопланиши 100 фоиз таъминланган ва тасвирни кўрсатиш бурчаги 178 даражага тенг.

Ноутбук ортиқча ёрқин қурилмаларсиз, минималистик дизайнли алюминий корпусга эга бўлган, фақат клавиатурада ёритиш тизими мавжуд. Қурилма ичидан 55 Вт/соатли аккумулятор ўрин олган бўлиб, унинг қуввати 5,5 соат ишлашга етади.

Redmi G’нинг турли процессор ва видеокарталарга эга бир нечта модификацияси мавжуд — базавий версиясига Intel Core i5-10200H пастволтажли процессори ҳамда NVIDIA GTX 1650 ўрнатилган. Қимматроқ моделларидан эса Core i5-10300H ёки i7-10750H ва GTX 1650 Ti видеокартаси ўрин олган. Барча версияларда тезкор хотира 16 гигабайтни, ички хотира эса 512 гигабайтни ташкил этади.

60 герц экран, Core i5-10200H ва GTX 1650 версияли ноутбук нархи 728 долларни ташкил этади. Худди шу каби ноутбук, бироқ экрани 144 герц бўлган версиясининг нархи 777 долларга тенг. Ҳозирда савдолар фақат Хитойда бошланган бўлиб, компания бошқа давлатларда ҳам ўз ноутбугини сотишни йўлга қўйиш ёки қўймаслиги номаълум.