Telegram Android’лар учун видеоқўнғироқлар функциясини ишга туширди

Telegram Android операцион тизими учун видеоқўнғироқлар функциясини ишга туширди. Бу ҳақда мессенжер блогида маълум қилинган.

iOS эгалари қўнғироқлар функциясидан илованинг тегишли янгиланиши AppStore модераторлари томонидан текширувдан ўтказилганидан сўнг фойдаланишлари мумкин бўлади.

Видеоқўнғироқни амалга ошириш учун фойдаланувчи профилидаги камера белгисининг устига босиш керак.

«Тўғридан-тўғри овозли қўнғироқлардан видеоқўнғироқларга ўтиш, шунингдек, қўнғироқни якунламай чатларда ёзишиш мумкин: уни экран бурчагидаги кичик ойнага чиқариб қўйса бўлади», — дейилади блогда.

Telegram гуруҳли видеоқўнғироқларни «яқин ойлар ичида» ишга туширишга ваъда берган.

Эслатиб ўтамиз, июнь охирларида Telegram’нинг 6.3 бета-версиясида суҳбатдошлар билан видеоқўнғироқ орқали суҳбатлашиш имконияти пайдо бўлган эди.