Xiaomi Мi 10 Ultra смартфонини ишлаб чиқариш учун Пекинда «ақлли завод»ни ишга туширди (видео)

Xiaomi компанияси Пекиннинг Ичжуань туманидаги иқтисодий-технологик зонада «ақлли заводи» (Smart Factory) иш бошлаганини маълум қилди. Компаниянинг сўнгги флагмани Xiaomi Мi 10 Ultra айнан шу ерда ишлаб чиқарилади, деб ёзади Gizmochina.

Завод ҳудуди 16 600 метр квадратга тенг. Унинг асосини 5G технологиялари ҳамда сунъий интеллект ташкил этади. Бу ерда тўлиқ автоматлаштирилган ишлаб чиқариш линиялари жойлашган бўлиб, барча жараёнлар — йиғишдан тортиб қадоқлашгача — машиналар томонидан амалга оширилади.

Фабрика йилига 1 миллион дона смартфон ишлаб чиқариш қувватига эга.

«Ақлли завод»да фақатгина премиум даражадаги смартфонлар йиғилади. Шунингдек, бу ерда янги материаллар, технология ва ишлаб чиқариш қурилмалари синовдан ўтказилади.