Apple ва Google ўз дўконларидан Fortnite ўйинини ўчириб ташлади

AppStore ва Google Play’дан Fortnite номли машҳур ўйин йўқолиб қолди — энди уни юклаб олиб бўлмайди. Ўйин дастурчилари ўзларининг тўлов тизимини жорий этишга уринган, бироқ бу дўконлар қоидасига тўғри келмайди, деб хабар беради «Hi-Tech.Mail.ru».

Барчаси Apple ва Fortnite ўйини яратувчиси Epic Games компанияси ўртасидаги можаро сабаб юзага келган. 13 август куни дастурчилар ўйинга иккита тўлов вариантини қўшган — комиссияли Apple Pay ёки комиссиясиз тўғридан-тўғри яратувчиларга тўлов.

Шундай қилиб Epic Games Apple чекловини айланиб ўтишга уринган, ўрнатилган обуна ва қўшимча харидларни амалга оширувчи дастурларни ишлаб чиқувчиларга уларнинг тўлов тизимини четлаб ўтадиган операцияларни амалга ошириш тақиқланган. Бунинг учун Fortnite иккита тўлов пунктини қўшган — масалан, Apple орқали 9,99 доллар ёки комиссиясиз 7,99 доллар тўлаш.

Apple компанияси AppStore’даги барча иловалардан 30 фоиз комиссия олади. Кимдир илова ичидаги тўловларни олиб ташлашга уринса, у дарҳол дўкондан ўчирилади — Fortnite билан ҳам худди шу ҳолат содир бўлган. Ўйин 13 август куни кечаси ўчириб ташланган.

Бунга жавобан Epic Games зудлик билан Apple’ни судга бериб, уни монополликда айблаган. Дастурчилар эътиборини тортиш мақсадида Apple’нинг эски рекламасига Жорж Оруэллнинг «1984» асари асосида ишланган пародияни эълон қилган. Шунингдек, компания ижтимоий тармоқларда #freefortnite хештегини ишга туширган.

Epic Games шахсий тўлов тизимини нафақат AppStore’га, балки Google Play’га ҳам қўшган. Иккинчи компания мазкур янгиликка Apple’дан беш соат ўтиб чора кўрган — ўйин Android-смартфонлар дўконидан ҳам ўчириб ташланган. Бунга жавобан Epic Games Google’ни ҳам судга бермоқда. Айблов ҳам худди олдингидек — ўз платформасидаги монополлик.

Ҳозирча аудиториясининг катта қисмини йўқотган Epic Games қандай йўл тутиши номаълум. Компания судни кутадими ёки Apple ва Google билан келишиб олишни бошлайдими? Компания ушбу можарони дастурчилар билан тўғридан-тўғри муҳокама қилишга тайёр эканлигини, бироқ улар учун ўзига хос шароит яратишга тайёр эмаслигини маълум қилган.