Ўзбекистон Президент фармонига асосан «Саховат ва кўмак» жамғармаси орқали республика бюджетидан ижтимоий ҳимояга муҳтож ва эҳтиёжманд оилаларга бир марталик моддий бериш доирасида Тошкент вилоятидаги 22 та туман ва шаҳарда «темир дафтар»га киритилган оилаларга ҳам моддий ёрдам пуллари деярли тарқатиб бўлинди. Бу ҳақда Тошкенти вилояти ҳокимлиги ахборот хизмати «Дарё»га маълум қилди.
Хабар берилишича, вилоят бўйича жами 34 972 та хонадон «темир дафтар»га киритилган бўлиб, улардаги оила аъзолари сони 151 минг нафардан ортиқни ташкил этади. Энг кўп эҳтиёжмандлар сони Янгийўл тумани ҳиссасига тўғри келади. Республика бюджетидан Тошкент вилояти учун ажратилган маблағ миқдори 20,8 миллиард сўмни ташкил этади. 2020 йилнинг 13 август куни ҳолатига кўра, ушбу маблағдан 19,6 миллиард сўми 23 785 та оилага тарқатиб бўлинган.
Туман ва шаҳарлар миқёсида олинса, Бўстонлиқ, Бекобод, Бўка, Юқори Чирчиқ, Ангрен, Чиноз, Зангиота, Тошкент, Қибрай, Оққўрғон, Ўрта Чирчиқ туманлари, Оҳангарон, Янгийўл, Нурафшон, Олмалиқ, Бекобод шаҳарларининг барча сектор раҳбарлари томонидан «темир дафтар»га киритилган жами эҳтиёжманд оилаларга маблағлар тўлиқ тўлаб берилган.
Ҳокимлик томонидан қайд этилишича, қолган ҳудудлар ҳам тез кунларда режани тўлиқ бажариши кутилмоқда.
Эслатиб ўтамиз, Қурбон ҳайити байрами арафасида республика бюджетидан «Саховат ва кўмак» жамғармаси орқали 150 минг оила 1 миллион сўмдан моддий ёрдам олганди. Шунингдек, 15 августгача 400 мингдан кўпроқ оиланинг ҳар бир аъзоси учун 220 минг сўмдан пул миқдори белгиланган. Кейинроқ яна 150 мингдан ортиқ оила моддий ёрдам олиши маълум бўлди.
Изоҳ (0)