Бухоро вилоятидаги буюм бозорлари стандартга асосан қурилган бўлса-да, ички йўлаклари жуда тор ва тиқилинч. Шу боисдан ҳам вилоятда карантин тартиби юмшатилишига қарамасдан буюм бозорлари фаолиятига рухсат берилмаган. Бу ҳақда вилоят ҳокими ўринбосари Фарҳод Умаров иштирокидаги брифингда маълум қилинди, дея хабар берди «Дарё» мухбири.
Таъкидланишича, буюм бозорларида тадбиркорлар томонидан қўшимча қурилишлар олиб борилгани йўлакларнинг янада торайишига сабаб бўлган.
Маълумки, 2020 йилнинг 6 августидан бошлаб, республиканинг айрим вилоятларида карантин талаблари юмшатилди. Бухорода вилоятида эса чекловлар 10 августдан бошлаб юмшатила бошланди.
Белгиланган тартибга мувофиқ 1070 та умумий овқатланиш шохобчалари (ресторан ва кафеларда банкетлар ҳамда бошқа оммавий тадбирларни ўтказишга йўл қўйилмайди), меҳмонхоналар, индивидуал шуғулланиш учун тренажёр залларига, шунингдек, вилоятдаги жами 3006 та тадбиркорлик субъекти бўлган мавжуд саккизта буюм бозори, қурилиш моллари савдоси билан шуғулланувчи объектлар, ноозиқ-овқат маҳсулотлари сотувчи шохобчалар, 725 та сартарошхона ва 333 та гўзаллик салони, 632 та нодавлат таълим маркази, тўгарак ва ўқув курслари фаолиятини тиклашга рухсат берилиши кўзда тутилган эди.
«2020 йилнинг июль ойида оғир қийинчиликлар келиб чиққанлиги сабабли буюм бозорлари фаолиятини йўлга қўйиш учун қатъий талаблар қўйилган эди. Бироқ бозорларимиз ҳозирча бу талабларга жавоб бермаяпти», — деди Фарҳод Умаров.
Умаровга кўра, вилоятдаги буюм бозорлари стандартга асосан қурилган бўлишига қарамай, ички йўлаклари жуда тор ва тиқилинч.
«‘Карвон бозори’ савдо мажмуаси шундай бозорлар сирасига киради. ‘Бухоро марказий бозори’нинг буюм бозорида эса талай ишлар бажарилган. Икки-уч кун ичида мазкур буюм бозорининг иш бошлаши кўзда тутиляпти. Шунингдек, туман бозорлари масаласи ҳам кўриб чиқилмоқда. Асосий мақсадимиз — халқимиз соғлиғи. Демак, талабга жавоб бермаса, уларнинг фаолиятини бошлашига рухсат берилмайди», — деди ҳоким ўринбосари.
Вилоятда жамоат транспорти фаолиятига ҳам рухсат берилмаганининг сабаби очиқланди.
«Жамоат транспортида ҳаракатланиш касаллик тарқалиши хавфини оширади. Ушбу масала ҳафта охиригача кўриб чиқилади», — деди Умаров.
Эслатиб ўтамиз, Ўзбекистонда 15 августдан карантин чекловлари юмшатилмоқда. 15 августдан бошлаб Тошкент метрополитени ва жамоат транспорти ҳаракати қайта тикланади. 20 августдан бошлаб эса буюм ва қурилиш маҳсулотлари бозорлари ҳамда буюмлар савдоси билан шуғулланувчи йирик дўконлар фаолиятига рухсат этилади.
Изоҳ (0)