Бишкек шаҳар суди Қирғизистоннинг собиқ президенти Алмазбек Атамбаевни жиноий авторитет Азиз Батукаевни ноқонуний равишда озод қилганликда айбланган суд қарорини ўз кучида қолдирди. Бу ҳақда «РИА Новости» хабар қилди.
Маълум қилинишича, 23 июнь куни Бишкекнинг Первомайский туман суди Атамбаевни коррупция айблови билан 11 йил икки ой муддатга қамоқ жазосига ҳукм қилган. Ҳукм юзасидан Бишкек шаҳар судига ҳам ҳимоячи, ҳам прокуратура томонидан шикоят қилинган. Лекин ҳукм ўз кучида қолдирилган.
«Судьялар ҳайъати Первомайский туман судининг ҳукмини ўз кучида қолдирди», – деди шаҳар суди вакили.
Қайд этилишича, 2006 йилда Батукаев Бишкек яқинидаги колониялардан бирида тартибсизликларни уюштирганлиги учун 16 йил 8 ой қамоқ жазосига ҳукм қилинган. Тартибсизлик пайтида депутат Тиничбек Акматбаев, Жазони ижро этиш бош бошқармаси бошлиғи Икматулла Полатов ва икки нафар парламент аъзоси ўлдирилган.
Батукаев 2013 йилда тиббий комиссия хулосаси билан қамоқдан озод қилинган. Унга қон саратони касаллиги ташхиси қўйилган. Бир неча соат ўтгач, у янги паспорт олган ва мамлакатни тарк этган.
Тергов маълумотларига кўра, унинг озод қилинишида юқори лавозимли амалдорлар, шу жумладан собиқ президент Атамбаев ҳам иштирок этган. Уларга «коррупцияни уюшган жиноий гуруҳ манфаатларида ташкил қилиш» айблови қўйилган.
Қирғизистон парламентдаги социал-демократлар партиясининг раҳбари Атамбаев ҳокимиятни 2017 йилдаги президентлик сайловларидан кейин ўзининг вориси ва энг яқин иттифоқчиси Сооронбай Жээнбековга топширган. Бироқ кўп ўтмай, собиқ президент жамоаси аъзоларига қарши жиноий ишлар очилди. Атамбаев собиқ президент мақомидан маҳрум қилинди ва оғир ва ўта оғир жиноятларда айбланди. Собиқ президент бир неча бор унга ва унинг шерикларига қарши барча айбловлар сиёсий характерга эга эканлигини таъкидлаган.
Мавзуга доир:
Изоҳ (0)