КХДР ҳукумати Жанубий Корея билан чегарада жойлашган Кэсон шарида жорий этилган қаттиқ карантин режимини бекор қилиш бўйича қарор қабул қилди. Бу ҳақда Корея Марказий телеграф агентлигига таяниб, «ТАСС» хабар берди.
26 июль куни КХДР ҳукумати Жанубий Кореядан чегарани ноқонуний кесиб ўтган фуқарода коронавирус касаллигининг белгилари кузатилганини маълум қилганди. Шу сабабли Кэсон шаҳрида 24 июлдан қаттиқ карантин режими жорий этилган эди. 25 июль куни Шимолий Корея етакчиси Ким Чен Ин Корея Меҳнат партияси Марказий қўмитаси билан ушбу вазият бўйича фавқулодда йиғилиш ўтказган. Шунингдек, у коронавирус тарқалишидан ҳимояланиш учун максимал тайёргарлик ҳолатига ўтишга тайёрлигини билдирган.
Расмий маълумотларга кўра, КХДРда ҳозирга қадар коронавирус билан касалланиш бўйича бирорта ҳолат қайд этилмаган. Бироқ Жанубий Кореянинг JoongAng Ilbo газетаси аноним манбаларга асосланиб ёзишича, КХДРда COVID-19 билан боғлиқ илк ҳолатлар 2020 йил февраль ойидаёқ қайд этилган. Январь охиридан бери мамлакатда касаллик тарқалишига қарши кескин чоралар қабул қилинган бўлиб, чегаралар ёпилган, мактаблар фаолияти тўхтатилган ва умуммиллий карантин жорий этилган.
Изоҳ (0)