Исроил ва Бирлашган Араб Амирликлари делегацияси уч ҳафта ичида тинчлик битимини имзолайди. Бу ҳақда АҚШ президенти Дональд Трампга таяниб, ABC News хабар берди.
Америка етакчисининг аниқлик киритишича, битимни расмий имзолаш маросими Оқ уйда бўлиб ўтади.
Трампнинг таъкидлашича, тинчлик битимидан ташқари Яқин Шарқда бошқа ижобий ўзгаришлар ҳам амалга оширилмоқда, бироқ у бу борада батафсил тўхталиб ўтмаган. Америка президенти бошқа мусулмон давлатлари Амирликдан намуна олиб, Исроил билан алоқаларини яхшилашига умид қилишини билдирган. «Ҳозирда бу масалани бошқа мамлакатлар билан муҳокама қилмоқдамиз», — дейди у.
БАА Исроил билан тўлиқ дипломатик ва иқтисодий муносабатларни барқарорлаштиришга рози бўлган араб мамлакатлари орасидаги учинчи давлатга айланди. Тинчлик битимига АҚШ воситачилигида эришилган бўлиб, учта давлатнинг биргаликдаги баёноти 13 август куни эълон қилинганди.
Эндиликда Исроил ва БАА инвестиция, туризм, тўғридан-тўғри авиарейслар, хавфсизлик, телекоммуникация ва бошқа масалаларга оид икки томонлама ҳамкорлик тўғрисидаги битимни имзолаши керак. Яқин кунлар ичида томонлар элчи ва элчихоналари билан алмашиши кутилмоқда.
Фаластин эса ўз навбатида БААнинг Исроил билан ярашувига салбий муносабат билдирган. Мамлакат президенти Маҳмуд Аббос Фаластиннинг Амирликдаги элчисини чақириб олиш бўйича топшириқ берган.
Эслатиб ўтамиз, январь ойининг охирларида АҚШ президенти Дональд Трамп Оқ уйда Исроил бош вазири Биньямин Нетаньяху билан чиқиш қилиб, Фаластин—Исроил можаросини барқарорлаштириш бўйича ўз режасини тақдим этганди. Кейинроқ Фаластин президенти Маҳмуд Аббос Трампнинг таклифига «Қуддус сотилмайди» дея жавоб қайтарган эди. Май ойида эса Маҳмуд Аббос Фаластин АҚШ ва Исроил билан барча келишувлардан чиқишини эълон қилганди.
Изоҳ (0)