Тожикистон Соғлиқни сақлаш вазирлиги Россиянинг коронавирусга қарши вакцинаси билан биринчи навбатда кимлар эмланишини маълум қилди

Тожикистонда Россия томонидан яратилган вакцина билан биринчи навбатда қандли диабети ва астмаси бор беморлар, назорат-ўтказиш пунктларида навбатчилик қилаётган тиббиёт ходимлари ва чегарачилар эмланиши режалаштирилмоқда, деб хабар беради Asia-Plus.

Маълум қилинишича, мамлакат Соғлиқни сақлаш вазирлиги коронавирусга қарши вакцинани олиш бўйича Россиянинг тегишли тузилмалари билан музокаралар ўтказишга киришган. Музокараларга дипломатлар ҳам қўшилган.

Таъкидланишича, вазирлик қошида Тожикистоннинг Россия вакцинасига бўлган эҳтиёжини ҳисобловчи ишчи гуруҳ тузилган. Биринчи навбатда эмланадиган тоифадан сўнг қолган барча фуқароларни оммавий вакцинация қилиш бошланади.

Аввалроқ Тожикистон коронавирусга қарши Россия вакцинасини қўлга киритиш бўйича ариза юборгани тўғрисида маълум бўлганди.

«Ҳукумат ва ривожланиш борасидаги ҳамкорлар ёрдамида Россия томонидан яратилган вакцинани олиш умидидамиз. Бунинг учун Тожикистон Соғлиқни сақлаш вазирлиги ишчи гуруҳ тузиши ва биринчи навбатда вакцинацияга муҳтож тоифа гуруҳини белгилаб олиши даркор», — дейилади хабарда.

Эслатиб ўтамиз, Гамалея номидаги Эпидемиология ва микробиология марказида ишлаб чиқилган вакцина рўйхатдан ўтказилди. Бу ҳақда Россия президенти Владимир Путин маълум қилди. У вакцина самарали эканлиги, шунингдек, қизларидан бири ушбу вакцина билан эмланганини айтган, бироқ айнан қайси қизи эканлигига тўхталиб ўтмаган. Вакцина у яратилган марказ, шунингдек, Зеленограддаги «Биннофарм» компанияси томонидан, кейинчалик эса бошқа корхоналарда ҳам ишлаб чиқарилади.