Самарқанд вилоятида Япония, Германия ва бошқа хориж давлатларига юборишни ваъда қилиб фуқароларнинг 786 миллион 948 минг сўм маблағини ўзлаштирган агентлик мансабдорларига жиноят иши қўзғатилди. Бу ҳақда «Дарё» мухбири Фарҳод Норбўтаев хабар берди.
Самарқанд ИИВ ҳузуридаги Тергов департаментининг маълум қилишича, Самарқанд шаҳри бўйича ИИО ФМБ ҳузуридаги Тергов бўлими томонидан 2020 йилнинг 2 март куни Consort хусусий бандлик агентлиги директори М.О. ва бошқаларга нисбатан Жиноят кодексининг 168-моддаси 3-қисми «б» банди (ўта хавфли рецидивист томонидан фирибгарлик) билан жиноят иши қўзғатилган.
Тергов ҳужжатларига кўра, фуқаро М.О. 2018 йилнинг декабрь ойида Consort хусусий бандлик агентлигини ташкил қилиб, 2019 йилнинг декабрь ойига қадар фаолият юритган. МЧЖ кўринишидаги агентлик фаолияти давомида фуқароларни хорижга ишга олиб чиқишни ваъда қилиб, кўп миқдордаги пулларни қўлга киритган.
Жиноят иши доирасида жами 95 нафар фуқаро ариза билан мурожаат қилиб, алданганини маълум қилган.
Тергов департаментининг таъкидлашича, жабрланган фуқароларнинг айримлари республиканинг турли вилоятларида истиқомат қилаётгани сабаб уларни сўроқ қилиш имконияти бўлмаган. Шу боис жиноят иши бўйича дастлабки тергов қайта тикланиб, тергов ҳаракати ўтказишга киришилган. Ҳозирги вақтда жиноят иши бўйича республиканинг турли вилоятларида яшаб келаётган ариза муаллифларини терговга жалб қилиш ва уларни сўроқ қилиш чоралари кўрилмоқда.
Жиноят иши бўйича агентлик раҳбари М.О. ва унинг шериги О.З. Жиноят кодексининг 168-моддаси 3-қисми «б» банди (ўта хавфли рецидивист томонидан фирибгарлик) билан гумонланувчи тариқасида сўроқ қилинган.
Жиноят иши бўйича фуқароларга етказилган 786 миллион 948 минг сўмнинг 366 миллион сўми тергов давомида қопланган. Тергов ҳаракатлари давом эттирилмоқда.
Эслатиб ўтамиз, Олий Мажлис Қонунчилик палатасининг Меҳнат ва ижтимоий масалалар қўмитаси томонидан «Ўзбекистонда миграция жараёнлари: муаммо ва ечимлар» мавзусида ўтказилган давра суҳбатида Ўзбекистондаги 30 та хусусий бандлик агентлиги бирорта ҳам фуқарони хорижга жўнатмагани маълум қилинганди. Шунингдек, Ўзбекистонда бир қатор хусусий бандлик агентликлари мансабдорлари устидан жиноят ишлари очилгач, ҳукумат томонидан мамлакатдаги барча хусусий бандлик агентликларини тугатиш бўйича Президентга таклиф киритилиши маълум қилинганди.
Изоҳ (0)