Республика махсус комиссияси фуқароларни автотранспорт ва метрополитен хизматларидан фойдаланганда ниқоб тақиш ҳамда ижтимоий масофа сақлаш режимига қатъий риоя қилишга чақирмоқда.
Таъкидланишича, ниқобсиз юриш қатъиян ман қилинади. Тартибга риоя қилмаганларга нисбатан қатъий чоралар қўлланилади ва жаримага тортилади.
Турли савдо мажмуалари, бозорлар, дўконларда қўлларни ташқи юзаларга тегишидан ҳимоялашни таъминлаш учун қўлқоплардан фойдаланиш зарур.
Махсус комиссия хабарига кўра, Европа ва Осиё мамлакатлари тажрибаси шуни кўрсатмоқдаки, фақатгина ижтимоий масофага ва мажбурий ниқоб тақиш режимига қатъий риоя қилиниши пандемия тарқалишининг олдини олишга ёрдам беради.
Эслатиб ўтамиз, Республика махсус комиссиясининг 12 августдаги қарори билан мамлакатнинг барча ҳудудларида жамоат транспорти фаолиятига 17 августидан рухсат берилиши маълум қилинганди. Тошкент шаҳрида эса жамоат транспорти ва метрополитен 15 августдан ўз ишини бошлайди.
Мамлакатдаги буюм ва қурилиш маҳсулотлари бозорлари ҳамда буюмлар савдоси билан шуғулланувчи йирик дўконлар фаолиятига эса 20 августдан рухсат берилади.
Изоҳ (0)