Жаҳон соғлиқни сақлаш ташкилоти она коронавирусга чалинган бўлса ҳам янги туғилган болани кўкрак сути билан эмизишни тавсия этмоқда. Бу ҳақда Коронавирусга қарши кураш штаби аъзоси, Соғлиқни сақлаш вазирлиги Оналик ва репродуктив саломатликни муҳофаза қилиш бошқармаси бошлиғи Барно Абдусаматова «Дарё» мухбири Мусулмонбек Иброҳимовга берган қисқача интервьюсида айтиб ўтди.
Барно Абдусаматованинг маълум қилишича, ҳомиладор аёллар билан биргаликда чақалоқларда ҳам коронавирусга чалиниш ҳолатлари кузатилган, лекин бу жуда минимал фоизни ташкил этган.
«Шуниси қизиқ бўлдики, даво муолажаларини буюрмасимиздан чақалоқларнинг иммунитети кучлилиги туфайли касаллик билан курашишга қодир эканлигини исботлаб берди. Жаҳон соғлиқни сақлаш ташкилоти она коронавирус билан касалланган бўлса ҳам янги туғилган болани кўкрак сути билан эмизишни тавсия этмоқда. Чунки кўкрак сутида жуда кўп иммуномодулинлар ва касалликка қарши курашувчи антитаналар мавжуд. Шу боис онанинг биринчи сути – биринчи эмлаш, деб номланади», — дейди Оналик ва репродуктив саломатликни муҳофаза қилиш бошқармаси бошлиғи.
Мутахассиснинг таъкидлашича, баъзи чақалоқларда ҳарорат кўтарилиши кузатилмаган, лекин тест натижалари мусбат чиққан. Такрорий тест олинганида онани даволаш жараёнида чақалоқлар юз фоиз тузалиб кетган ҳолатлари кузатилган.
«Биз ўз тажрибаларимизда шунга амин бўляпмизки, она сути билан озиқланган чақалоқларда вакцинацияга ўхшаган ҳолат кузатилмоқда. Коронавирус билан касалланган онадан туғилган чақалоқларни 12-24 соат ичида биринчи тестини оламиз, 24 соатдан кейин такрорий тест оламиз. Ўша такрорий тестлардан биляпмизки, чақалоқлар касаллик билан ўзлари курашиш қобилиятига эга. Уларда касалликни енгил кечиши ҳолати бўлса, биз ҳеч қандай даво муолажаларини қўшмаслигимиз керак, организмнинг ўзига қўйиб бериш лозим», – деди у.
Эслатиб ўтамиз, аввалроқ Коронавирусга қарши курашиш штаби аъзоси, профессор Ҳабибулло Оқилов эмизикли оналар коронавирусга чалинган бўлса, фарзандини қандай эмизиши борасида аниқлик киритиб ўтган, Соғлиқни сақлаш вазирлиги томонидан Ўзбекистонда коронавирусга чалинган ҳомиладор аёллар учун қандай шароитлар яратилгани ҳақида маълумот берилган эди.
Изоҳ (0)