Тошкент шаҳрида ҳаракатланувчи жамоат транспорти автобусларига электрон карталар орқали йўл ҳақини тўлаш имконини берувчи валидаторлар ўрнатилмоқда. Бу ҳақда «Тошшаҳартрансхизмат» компанияси хабар берди.
Маълум қилинишича, асосан, марказий йўналишларда ҳаракатланувчи автобусларга электрон тўловларни қабул қилувчи 200 та валидатор ўрнатилди.
Ушбу стационар валидаторлардан фойдаланишда йўловчиларда кўникма ҳосил қилиш, бу борада транспортга чиқиб-тушиш қоидаларига амал қилишни таъминлаш дастлабки синов даврининг асосий вазифаси ҳисобланади.
Шундан келиб чиқиб, компания йўловчилардан автобусга чиқишда олд эшикдан, тушишда эса ўрта ва орқа эшиклардан фойдаланишларини сўрамоқда.
Эслатиб ўтамиз, Тошкент шаҳрида 15 августдан бошлаб жамоат транспортининг барча турлари, жумладан, метро ўз фаолиятини қайта бошлайди.
Маълумот учун, 2020 йилнинг январь ойидан бошлаб Тошкент шаҳар жамоат транспорти — автобус ва метрополитен йўналишларида автоматлаштирилган тўлов тизимини жорий этиш ишлари бошланган. Дастлабки босқичда «Тошшаҳартрансхизмат» таркибидаги автобуслар электрон тўловларни қабул қилувчи мобил валидаторлар билан таъминланганди.
Изоҳ (0)