Ҳиндистонлик таниқли актёр Санжай Датт нафас қисилишидан шикоят қилиб, касалхонага борган. Унда коронавирус тести салбий чиқди. Бироқ Санжайга 3-босқич ўпка саратони ташхиси қўйилди. У даволаниш учун АҚШга учади. Бу ҳақда Bollywoodtime хабар берди.
Фото: Bollywoodtime
«Баба жуда тушкунликка тушди. Унинг кичкина болалари бор. Яхшиямки, ҳозир улар оналари билан Дубайда. Аммо уларга бу даҳшатли хабарни айтиш ҳақиқатда оғир. Санжай руҳий изтиробда, лекин тузалиб кетишига ишонади. Санжай зудлик билан жиддий даволаниши керак. Шунинг учун ҳам у шошилинч учиб кетди», — дейди яқин дўсти.
Санжай Датт рафиқаси ва фарзандлари билан.
Фото: India TV News
Санжай касаллигининг жиддийлиги ҳақида хабар тарқалиши билан Амитабҳ, Абҳишек Баччан ва Салмон Хон актёр билан боғланишга уринди, аммо у қўнғироқларга жавоб бермаган.
Маълумот учун, Санжай Датт 1959 йилда Ҳиндистоннинг Мумбай шаҳрида туғилган. У «Исм», «Таъқиб», «Соҳибжамол», «Севгилим» каби юздан ортиқ фильмларда суратга тушган. Ўзбек томошабинларига Санжай «Муннабой» фильмидаги қувноқ ва ҳазилкаш йигит образи билан яхши таниш.
