Бухоро вилоятида жойлашган ва фойдаланишга яроқсиз бўлиб қолган 16 та маданий мерос объектини қайта тиклашга маҳаллий ҳамда хорижий инвесторлар жалб қилиниб, 65,6 миллиард сўм маблағ ажратилди. Бу ҳақда «Дарё»га Бухоро вилоят маданий мерос бошқармаси бошлиғи Шерзод Маҳмудов маълум қилди.
Таъкидлашича, айни пайтда Маданият вазирлиги томонидан Бухоро вилоятидаги энг оғир аҳволда бўлган 12 та маданий мерос объектида қайта тиклаш ишлари бошлаб юборилган. Шаҳардаги «Намозгоҳ», «Равғангарон», «Хўжа Калон», «Қуйи Хонақо», «Кунжак», «Лаби Ҳовуз Қози Калон» масжидлари ҳамда «Тошсарой», «Кўкалдош» ва «Чуқур» мадрасалари, шунингдек, Когон тумани Баҳоуддин Нақшбанд мажмуасининг Токи-Миёна дарвозахонаси қолдиқлари, Шофиркон туманидаги Хўжа Ориф ар-Ревгарий (Моҳитобон) мажмуаларида реставрация-таъмирлаш ишлари учун маблағлар ажратилган.
2020 йил йилда Бухородаги сайёҳлар ташриф буюрадиган объектлар сонини 139 тага етказиш мақсад қилинган. Бунинг учун Маданият вазирлиги ҳузуридаги Марказлашган инвестициялар ҳисобидан молиялаштирувчи объектларни қуриш, реконструкция қилиш, мукаммал ва жорий таъмирлаш бўйича буюртмачи хизмати давлат муассасаси ҳамда Маданият вазирлиги Маданий мерос департаменти томонидан мазкур объектлар ҳудудида янги туристик мавсумгача қадар қурилиш-таъмирлаш ишлари якунланиши кўзда тутилган.
Бундан ташқари, вилоятдаги 16 та маданий мерос объекти, жумладан, «Карвонбоши» саройи, «Туркман» мадрасаси, «Ҳотам Ҳинду мадрасаси, «Мир Иброҳим» ва «Рашид» карвонсаройларида маҳаллий ва хорижий инвесторларни жалб қилган ҳолда сайёҳлик марказлари ташкил этиладиган бўлди.
«Узоқ йиллар давомидаги кучли шамол ва ёғингарчиликлар, қайта тиклаш ва таъмирлашда маблағларнинг етишмовчилиги, туризм тизимидаги оқсоқликлар мазкур объектларнинг ачинарли аҳволга келиб қолишига сабаб бўлган. Айни пайтда уларни тўлиқ миллий услубда қайта тиклаш ва фаолиятини йўлга қўйиш мақсадида маҳаллий ва хорижий инвесторлар томонидан 65,6 миллиард сўм маблағ ажратилган. Унда ҳунармандчилик марказлари, миллий чойхоналар, табобат марказлари, сайёҳлар учун карвонсаройлар хизмати йўлга қўйилади», — дейди Шерзод Маҳмудов.
Айни пайтда «Туркман» карвонсаройида «Нейромед сервис Бухоро» МЧЖ томонидан таъмирлаш ишлари олиб борилмоқда. Инвестор лойиҳасига кўра, мазкур маданий объектда табобат маркази фаолияти йўлга қўйилади. Шунингдек, «Азия роял тур» хусусий корхонаси «Мир Иброҳим» мадрасасида инсон саломатлигига аҳамиятли бўлган шифобахш гиёҳ ва ўсимликлар билан таъминланган «Авицена» чойхонасини тиклашга киришган. «Домла Турсунжон» мадрасаси эса «Олтин ҳунарманд» МЧЖ томонидан таъмирланиб, унда ҳунармандчилик маркази фаолияти йўлга қўйилиши режалаштирилган.
Изоҳ (0)