Mercedes-Benz Sprinter модели Maybach’дан ҳам қиммат турувчи автоуйга айлантирилди (фото)

Автоуйлар яратиш ва минивенларни қайта жиҳозлашга ихтисослашган Midwest Automotive Design фирмаси Mercedes-Benz Sprinter базасидаги янги Daycruiser 144 кемперини тақдим этди, деб хабар беради Motor.

Мазкур кемпер бозордаги бошқа таклифлардан салони ҳашаматли тарзда безатилгани ва кўплаб қўшимча қурилмаларга эга эканлиги билан ажралиб туради. Машина нархи 172,5 минг доллардан бошланмоқда. Шу орқали у Mercedes-Maybach S-Class’дан ҳам қимматроққа айланган.

Sprinter базасида яратилган ғилдираклар устидаги уйнинг узунлик 7,3 метрга етади. Яшаш қисмини жиҳозлашда қимматбаҳо материаллардан фойдаланилган: сифатли чарм ва табиий ёғоч. Ички қисмига Maybach услубидаги ўриндиқлар ўрнатилган. Стандарт кемпер ванна ва ҳожатхона, музлаткич, микротўлқинли печ, раковина, шунингдек, бир ёки иккита йиғма диван билан жиҳозланган.

Midwest Automotive Design янги модель учун кўплаб қўшимча қурилмаларни таклиф этади, бироқ унинг учун алоҳида пул тўлаш керак бўлади. Масалан, 2 минг доллар эвазига симсиз интернет ўрнатиш, худди шунча маблағга телевизор буюртма қилиш ҳамда 7,5 минг долларга сунъий йўлдошли телевидениедан фойдаланиш мумкин.

Яна 11 минг долларга «пневмоподвеска», 3,7 минг долларга эса йўлтанламас покришкалари ҳамда 15 минг долларга — тўлиқ узатмали тизимдан фойдаланиш мумкин. SiriusXM сунъий йўлдош радиоси, кондиционер ва генераторни ихтиёрий ўрнатиш таклиф этилади.