Голливуд актёри Сильвестр Сталлони ўзининг шахсий Cadillac Escalade йўлтанламасини 350 минг доллар эвазига сотувга қўйди. Актёрнинг сўзларига кўра, у мазкур ҳашаматли автомобиль интерьерини лойиҳалашда бевосита иштирок этган, деб хабар беради Motor.
Cadillac Escalade ESV ғилдирак базалари каттартирилган йўлтанламас ҳисобланади. Бироқ актёрнинг хоҳишига кўра, Калифорниядаги Becker Automotive Design ательеси тюнерлари автомобиль узунлигини яна 50,8 сантиметрга узайтирган. Модификация натижасида автомобиль узунлиги 6 метрдан ошиб кетган.
Ҳашаматли йўлтанламас интерьерини Сталлоненинг шахсан ўзи лойиҳалаштирган. Модификацияга учраган Escalade салони юқори сифатли оқ чармдан ишланган. Бундан ташқари, автомобиль ичига массаж ўриндиғи, 43 дюймли телевизор, йиғма столлар, шунингдек, дарпардалар, мини-бар ва сенсор бошқарувга эга аудиотизим ўрнатилган.
Cadillac Escalade капоти остидан 426 от кучига эга олти литрли V8 двигатели ўрин олган. Агрегат саккиз поғонали автомат узатмалар қутиси ёрдамида бошқарилади. Одометрга кўра, машина 1609 километр йўл босган бўлиб, Сталлоне улкан йўлтанламасдан деярли фойдаланмаган.
Жангари фильмлар юлдузига тегишли автомобилни 350 минг долларга харид қилиш мумкин.
Изоҳ (0)