2020 йилнинг 12 августдан Навоий шаҳридаги буюм бозорлари ва улар атрофидаги йирик савдо нуқталари ўз фаолиятини бошлайди. Бу ҳақда Навоий вилояти ҳокимлиги ахборот хизмати хабар қилган.
Ҳокимлик хабарига кўра, Навоий шаҳар ҳокими М.Бозоров тегишли масъуллар ҳамда шаҳар ишчи гуруҳи аъзолари ҳамкорлигида Навоий шаҳридаги буюм бозорлари ва йирик савдо нуқталарида бўлиб, уларнинг фаолиятини йўлга қўйиш бўйича олиб борилаётган ишларни кўздан кечирган.
«Жараёнда тадбиркорларнинг Навоий шаҳар ҳокимига қилган мурожаатлари инобатга олиниб, ишчи гуруҳ аъзоларининг ижобий хулосасига кўра буюм бозорлар ва савдо нуқталари фаолиятига рухсат берилди.
Мазкур савдо нуқталари фаолиятини карантин қоидаларига қатъий амал қилган ҳолда олиб бориши бўйича тегишли масъулларга кўрсатма ва топшириқлар берилди. Хусусан, харид жараёнида фуқаролар ўртасида оралиқ масофага жиддий эътибор қаратиш, карантин талабларига асосан фуқароларни бозор ҳудудига киришини ташкил этиш масалаларига ўта масъулият билан ёндашиш лозимлиги уқтирилди», – дейилади хабарда.
Қайд этилишича, Навоий шаҳри ҳудудида карантин талаблари босқичма-босқич юмшатилмоқда. Шаҳарда карантин талаблари асосида деҳқон бозорлари ҳамда қурилиш маҳсулотлари савдоси билан шуғулланувчи «Дархон» бозори фаолиятини бошлаган.
Аввал Наманган вилоятида туман ҳокимликлари ҳузуридаги карантин чекловларини юмшатиш ва тадбиркорлик субъектлари фаолиятига босқичма-босқич рухсат бериш бўйича тузилган махсус ишчи гуруҳлар хулосаси асосида барча турдаги ихтисослаштирилган бозорлар фаолияти йўлга қўйилиши хабар қилинганди.
Эслатиб ўтамиз, 2020 йил 29—30 июль кунлари Фарғона вилоятида коронавирусга қарши курашиш бўйича махсус комиссия қарори билан вилоятдаги барча туман ва шаҳарларда жойлашган буюм бозорларининг фаолият юритишига икки кунга рухсат берилганди. Кейинчалик 3 августдан Фарғона вилоятида буюм бозорлари, хусусий боғчалар, гўзаллик салонлари ва сартарошхоналар ўз фаолиятини бошлаган.
Изоҳ (0)