Самарқандда вилоят эпидемияга қарши курашиш фавқулодда комиссияси хулосасига кўра, 2020 йилнинг 12 августидан карантин қоидалари юмшатилиб, ошхона ва меҳмонхоналар, гўзаллик салонлари ва спорт ўйингоҳлари фаолиятига рухсат берилади. Бу ҳақда «Дарё» мухбири Фарҳод Норбўтаев хабар берди.
Таъкидланишича, 12 августдан бошлаб вилоятда соат 06:00 дан 23:00 га қадар автотранспорт воситаларида стикерсиз ҳаракатланишига рухсат берилади. Шунингдек, соат 08:00 дан 20:00 гача икки метрдан кам бўлмаган ижтимоий масофани таъминлаб, бир стол атрофида тўрт кишидан кўп бўлмаган ҳолда умумий овқатланиш объектлари фаолиятига ҳам рухсат берилади.
Комиссия қарорига кўра, нодавлат мактабгача таълим ташкилоти, ноозиқ-овқат маҳсулотлари чакана савдо дўконлари ва заргарлик дўконлари, сартарошхона ва гўзаллик салонлари, меҳмонхоналар, очиқ сунъий қопламали спорт ўйингоҳлари, спорт сексиялари, тўгараклари, спорт заллари ва фитнес клублари ҳам ўз фаолиятини бошлайди.
10 кишидан кўп бўлмаган гуруҳлар ташкил этган ҳолда таълим марказлари ва тўгараклар фаолияти ҳам йўлга қўйилади.
Рухсат берилган фаолият турларининг карантин қоидаларига риоя этилиши устидан вилоят Санитария-эпидимологик назорат бошқармаси назоратни амалга оширади. Карантин талабларини бузган муассасалар, тадбиркорлик субъектларига нисбатан қатъий чора кўрилади.
Эслатиб ўтамиз, 11 августдан бошлаб Фарғонадаги ошхона, ресторан ва кафелар ўз фаолиятини қайта бошлаши ҳақида хабар берилганди.
Изоҳ (0)