Фарғонага донаси 4 млн сўм бўлган 500 дона кислород концентратори олиб келинди. Бухоро ҳокимлиги кислород концентраторларини 12 млн сўмдан харид қилганди

Фарғона вилоятидаги тиббиёт муассасалари учун 500 дона кислород концентратори ва 5 мингта пульсоксиметр олиб келинди, дея хабар берди «Дарё» мухбири.

Қайд этилишича, вилоятга Хитойдан коронавирус инфекцияси билан касалланган беморларни даволашда қўлланиладиган 3 миллиард сўмлик тиббий буюмлар келтирилган. Бир дона кислород концентратори 4 миллион 200 минг сўмдан, пульсоксиметр эса 150 минг сўмдан харид қилинган.

Мазкур тиббий жиҳозлар COVID-19’ инфекцияси билан касалланган беморларни жойлаштириш учун тайёрлаб қўйилган захира масканларга топширилган.

Вилоят ҳокимлиги ахборот хизматининг маълум қилишича, Шуҳрат Ғаниев Фарғона шаҳридаги «Само» спорт мажмуасида ташкилланган ташхислаш ва тақсимлаш марказида ушбу жиҳозларнинг ўрнатилиш жараёни билан танишган. Ҳоким «Қўқон» эркин иқтисодий зонасида кислород концентраторлари ишлаб чиқарадиган янги корхона иш бошлашини маълум қилган.

«Вилоятимизда тайёрланган захира ўринларига бу кислород концентраторлари ва пульсоксиметрларининг биринчи қисми етказилмоқда. Шунингдек, бу каби зарур жиҳозлар билан барча тиббиёт масканларимизни таъминлаш тадбирларини кўрганмиз. Бундан ташқари, яқин кунларда ‘Қўқон’ эркин иқтисодий зонасида худди шундай тиббий жиҳозларни ишлаб чиқарадиган йирик корхона ишга туширилади. Вилоятимиздаги барча шифокорлар ва тиббиёт ходимлари бепул пульсоксиметрлари ва бошқа тиббий жиҳозлар билан таъминланади», — деди вилоят ҳокими.

Эслатиб ўтамиз, Бухоро вилоят соғлиқни сақлаш бошқармаси коронавирус билан оғриган беморларга ёрдам бериш мақсадида Dynmed компаниясининг ҳар бири 12 миллион сўм турувчи 50 дона тиббиёт концентраторини сотиб олгани ҳақида хабар берилганди.

Telegram’даги «Bakiroo» канали юритувчиси Отабек Бакиров Dynmed компаниясининг кислород концентраторлари Alibaba’да 320 доллардан таклиф этилаётганини, агар 100 тадан ортиқ олинса, 220 доллардан сотилаётганини ёзиб қолдирди. Шунингдек, «Troll.uz» каналида ҳам 50 дона концентратор орасидаги фарқ 436 миллион сўм экани танқид қилинган.

Бухоро ҳокими ўринбосари Мирали Ҳамроев мазкур ҳолатни изоҳлар экан, давлат ҳокимияти ва бошқаруви органлари томонидан олиб борилаётган ишларга асоссиз хулоса берилаётганини қоралашини билдириб, блогер айтаётган нархда кислород концентратори бор бўлса, харид қилишга тайёрлигини айтганди.

Молия вазирлиги эса Бухородаги кислород концентраторларининг сотиб олинишининг қонунийлигига изоҳ берди.