Ўзбекистоннинг қатор ҳудудларида қонунга хилоф равишда гиёҳванд моддалари савдоси билан шуғулланган шахслар қўлга олинди, деб «Дарё»га хабар бермоқда Давлат хавфсизлик хизмати.
Маълум қилинишича, Й.Х. исмли шахс Тошкент шаҳридаги «Фарҳод» деҳқон бозори ҳудудида таниши Абдували исмли шахсдан 150 грамм опий гиёҳвандлик воситасини жами 19 500 000 сўм эвазига сотиб олганлигини ҳамда оз миқдорини ўзи истеъмол қилиб, қолган қисмини Хоразм вилоятида сотиш мақсадида олиб кетаётганлигини маълум қилди.
Шунингдек, Тошкент—Урганч йўналиши бўйича ҳаракатланиб кетаётган, 1973 йилда туғилган Й.Х. бошқарувидаги Hyundai русумли автомашина кўздан кечирилганда, унинг юкхонасидаги ноутбук жойланган сумка ичидан 133,35 грамм опий гиёҳвандлик воситаси холислар иштирокида процессуал тартибда расмийлаштириб олинган.
ДХХ Чегара қўшинлари ҳарбий хизматчилари томонидан Тошкент вилояти Бекобод шаҳри «Сайхун» МФЙ ҳудудидан ўтувчи ўзбек-тожик давлат чегарасидан мамлакатга олиб кириш учун Тожикистон томонидан улоқтирилган 892,5 грамм гашиш гиёҳвандлик моддаси топилди. Ҳозирда мазкур гиёҳванд модданинг кимга тегишли эканлигини аниқлаш бўйича зарур чора-тадбирлар кўрилмоқда.
ДХХ Хоразм вилояти бошқармаси вилоят ҳуқуқ-тартибот идоралари билан ҳамкорликда Тупроққалъа тумани «Саримой» ЙПХ масканида ўтказилган тезкор тадбирлар давомида Самарқанд—Урганч йўналишида ҳаракатланиб кетаётган 1978 йилда туғилган С.С. бошқарувидаги Malibu русумли автомашина холислар иштирокида кўздан кечирилганда, автомашинанинг тепа ойна қисмида 3 дона целлофан пакетда алоҳида скотч билан ўралган жами 336 грамм опий гиёҳвандлик воситаси борлиги аниқланди.
С.С. ушбу оғуни Самарқанд вилоятида Алишер исмли шахсдан келгусида сотиш мақсадида 2300 АҚШ доллари ҳамда 35 500 000 сўмга сотиб олганлиги маълум бўлди.
Шунингдек, Тошкент—Урганч йўналиши бўйича ҳаракатланиб кетаётган Isuzu русумли юк автомашинаси ҳам «Саримой» ЙПХ масканида тўхтатилиб текширилган. Натижада автомобилда йўловчи сифатида кетаётган, 1972 йилда туғилган Р.Й. ёнидан 185,49 грамм опий гиёҳвандлик воситаси топилган.
Маълум бўлишича, Р.Й. таниши Қудрат исмли шахс билан ўзаро тил бириктириб, Мадиёр исмли шахсдан, тахминан, 600 грамм опий гиёҳвандлик воситасини 6800 АҚШ долларига сотиб олган. Ундан, тахминан, 400 граммини Қудратда қолдириб, қолган қисмини сотиш мақсадида Хоразмга олиб кетаётган бўлган.
Шунингдек, ДХХ Бухоро вилояти бошқармаси ҳамда вилоят Божхона бошқармаси ходимлари ҳамкорлигида ўтказилган тезкор-тадбир давомида 1980 йилда Андижон вилоятида туғилган А.Ф. исмли шахс Тошкент шаҳридан Бухоро шаҳрида жойлашган темирчилик цехларидан бирига келган вақтида унга тегишли бўлган чарм сумка кўздан кечирилганда, унинг ичида 173,15 грамм гашиш гиёҳвандлик моддаси борлиги аниқланган.
Бундан ташқари, олинган тезкор маълумотлар асосида, А.Ф. Тошкент шаҳрида вақтинча яшаш хонадони кўздан кечирилганда, унга тегишли бўлган куртка чўнтагида ҳам 220 грамм гашиш гиёҳвандлик моддаси борлиги аниқланиб, холислар иштирокида процессуал тартибда расмийлаштириб олинган.
Навбатдаги ҳолат Тошкент шаҳрида қайд этилди. ДХХ ва шаҳар Божхона бошқармаси ходимлари томонидан 1980 йилда туғилган Р.С. Чилонзор туманида 1974 йилда туғилган И.Ш.га 100 грамм гашиш гиёҳвандлик моддасини сотаётган вақтида қўлга олинди. Шунингдек, уларда мавжуд бўлган 1550 АҚШ доллари ва 2 миллион сўм ҳам ашёвий далил сифатида олиб қўйилди.
С.Р. Чилонзор туманидаги яшаш хонадони кўздан кечирилганда, у ерда 1976 йилда туғилган И.О. ҳамда 1987 йилда туғилган Р.А. тегишли бўлган 195 грамм гашиш моддаси топилди.
Ҳозирда аниқланган барча ҳолатлар юзасидан Жиноят кодексининг тегишли моддаларига асосан жиноят ишлари қўзғатилиб, тергов ҳаракатлари олиб борилмоқда.
Мавзуга доир:
Изоҳ (0)