Хитойда ўлимга олиб келиши мумкин бўлган SFTS деб номланган хавфли янги вирус аниқланди. Бу ҳақда Global Times нашрига таяниб «Korrespondent.net» хабар бермоқда.
Мутахассислар ушбу вирус, асосан, ҳашаротлар чақиши орқали юқишини аниқлади. Мамлакатда 2020 йилнинг биринчи ярмида 60 дан ортиқ одамда бу вирус аниқланган, улардан етти нафари вафот этган.
Чжэцзян университети вирусологи Шэн Цзифаннинг таъкидлашича, вируснинг одамдан одамга юқишини истисно қилиб бўлмайди. У қон ёки йиринг орқали юқиши мумкинлигини аниқланган.
Статистик маълумотларга кўра, SFTS инфекциясининг 60 фоизидан ортиғи Хитойнинг шарқидаги Цзиянсу провинциясида, қолганлари Аньхой ва Чжэцзянда қайд этилган. Касалланганларда иситма, йўтал, қонда лейкоцитлар даражасининг пасайиши, шунингдек, тромбоситлар шаклланиши каби аломатлар намоён бўлган.
Маҳаллий вирусологларнинг таъкидлашича, ушбу касалликнинг қўзғатувчиси 2011 йилда кашф қилинган бўлиб, умуртқали ҳайвонлар, артроподлар ва ўсимликларда учрайдиган бунявируслар оиласига тегишли. Хитойлик шифокорларнинг таъкидлашича, SFTS ҳали яхши ўрганилмаган. Шифокорлар эҳтиёт бўлиш ҳамда гигиена қоидаларига риоя қилиш кераклигини таъкидлаган.
Аввалроқ Хитойда пандемияга сабаб бўлиши мумкин бўлган янги чўчқа гриппи аниқланган эди. Кейинчалик Хитой ҳукумати чўчқа гриппининг янги штамми пандемияни юзага келтириши мумкинлиги ҳақидаги тадқиқот натижаларини ишончсиз деб топди.
Изоҳ (0)