Андижон шаҳрида 17 ёшли И.Ў. исмли фуқаро ўзи ишлайдиган автомобиль ювиш шохобчасидаги раҳбарининг Spark’ини олиб қочиб йўл-транспорт ҳодисасини содир этди. Бу ҳақда Тергов департаменти хабар қилган.
Қайд этилишича, 2020 йил 3 август куни тунги соат 03:30 ларда Андижон шаҳри, Фурқат кўчасида жойлашган автомашиналарни ювиш шохобчасида оғзаки келишув асосида ёлланма ишчи сифатида ишлаб келган, вояга етмаган 17 ёшли И.Ў. фуқаро С.Б.га тегишли Spark’ни олиб қочган.
«Мойка» эгасининг машинасини қулфламагани ва калитни ўт олдиргичда қолдиргани йигитга қўл келган. У Spark’да кундуз куни соат 13:30 ларда, Андижон тумани, Келажак авлод кўчасида юк машинасининг орқасига бориб урган.
Ҳолат юзасидан Андижон шаҳри бўйича ИИО ФМБ ҳузуридаги Тергов бўлими томонидан вояга етмаган 17 ёшли И.Ў.га нисбатан Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилган.
Дастлабки тергов жараёнида вояга етмаган И.Ў. процессуал тартибда ушланган ва гумон қилинувчи тариқасида ишда иштирок этишга жалб қилинган, дейилади департмент хабарида.
Аввал июнь ойида Олтиариқ туманида жойлашган автомобилларни ювиш шохобчасидан Nexia-3 русумли машинани миниб қочган фуқаро ушлангани, Бухоро вилоятида ҳамқишлоғининг мотоциклини ўғирлаб, транспорт воситасини бўлакларга бўлиб сотишни мақсад қилган фуқарога нисбатан жиноят иши қўзғатилгани, июлда эса Тошкент вилояти Қуйи Чирчиқ туманида 28 ёшли А.Г. хонадондан «ВАЗ-2106» машинасини олиб қочгани, бироқ машина техник жиҳатдан носоз бўлиб бузилиб қолгани оқибатида «Жигули»ни йўл четида қолдириб, чап олд эшиги ойналарини синдириб ҳодиса жойидан яширингани, Тошкент вилояти Чирчиқ шаҳрида Spark русумли автомобилни олиб қочган хавфли рецидивист қўлга олингани ҳақида хабарлар берилган.
Изоҳ (0)