2020 йилнинг иккинчи чорагида Россия чегаралари пандемия туфайли ёпилган вақтда мамлакатга ярим миллион чет эллик кириб келди. Бу ҳақда Россия Федерал хавфсизлик хизмати чегара хизмати статистикасига таяниб «РБК» хабар бермоқда.
Қайд этилишича, 2020 йилнинг апрель—июнь ойларида Россияга 509 минг нафар чет эл фуқароси кириб келган. Уларнинг учдан икки қисми Қозоғистон, Украина, Беларусь, Ўзбекистон ва Филиппин фуқаролари бўлган. Россияга ташруф буюрувчилар сони ўтган йилнинг шу даврига нисбатан 17 бараварга камайган. 2019 йилда бу кўрсаткич қарийб 8,7 миллион кишини ташкил қилган.
Пандемия пайти мамлакатга келган кишиларнинг 438 нафари чегарада ўзларини транспорт воситалари хизматчилари деб таништирган. 55 минг нафари шахсий мақсадларда, 12 минг нафари эса иш юзасидан келганини айтган. Уларнинг бирортаси сайёҳлик мақсадида келмаган.
Россияга доимий яшаш мақсадида қарийб 1400 киши келган. Бир йил аввал улар сони атиги 171 кишини ташкил қилган.
2020 йилнинг апрель—май ойларида россияликларнинг қарийб 442 минг нафари бошқа мамлакатларга кетган. Уларнинг ярмидан кўпи Финландия, Қозоғистон, Украина, Хитой ва Абхазияга кетган. Таъкидланишича, мамлакатдан чиқиб кетувчилар оқими 27 баравар камайган. 2019 йилнинг иккинчи чорагида Россия фуқароларининг 12,8 миллион нафардан ортиғи мамлакатни тарк этган.
Россиядан чиқиб кетганларнинг аксарияти мамлакатга кириб келган чет элликлар каби транспорт воситалари хизматчилари бўлган.
Эслатиб ўтамиз, Россия халқаро авиқатновларни 27 мартдан бошлаб тўхтатди. 30 мартдан бошлаб денгиз ва қуруқлик чегалари ҳам ёпилган. Шундан буён улар қисман очилган холос. Хусусан, 6 июндан ишга, ўқишга, даволанишга ва қариндошлари ҳолидан хабар олиш учун кетадиганларга мамлакатдан чиқишга рухсат берилди. Шунингдек, хорижликларга Россияга даволаниш ва яқин қариндошларига қараш учун кириши мумкин бўлди.
Изоҳ (0)