Байрутдаги портлашлардан кейин порт ишчиларининг айримлари ҳибсга олинди

Ливан ҳукумати Байрутдаги портда аммиак селитрасини сақлашга алоқадор ходимларнинг айримлари тергов давомида уй қамоғига жойлаштирилганини маълум қилди, деб хабар бермоқда Associated Press. Эслатиб ўтамиз, 4 август куни Ливандаги портда бир нечта кучли портлашлар юз берганди.

Агентлик хабарига кўра ишчиларни қамоққа олиш юзасидан тегишли қарор ҳукуматнинг ҳодиса бўйича ўтказган фавқулодда йиғилишида чиқарилган ва унда портлашлар порт ходимларининг ишга совуққонлик билан муносабатда бўлгани туфайли содир бўлгани қайд этилган.

Al-Jazira телеканалининг маълум қилишича, Ливан ички ишлар вазири Муҳаммад Фаҳмий портлашлар юзасидан тергов жараёни очиқ тарзда ўтиши ва беш кун давом этишини билдирган. Шунингдек, у бу борада халқаро тергов ўтказиш юзасидан таклифларни ҳам инкор қилган.

Ливан ҳукумати Байрут ҳудудида икки ҳафталик фавқулодда ҳолат тартибини жорий қилган.

Бир нечта кучли портлаш Байрут шаҳридаги порт ҳудудида содир бўлган. Сўнгги маълумотларга кўра ушбу ҳодисалар оқибатида 100 нафардан ортиқ одам ҳалок бўлган ва 4 минг нафарга яқин киши жароҳат олган. Портлаш зарбининг кучи Кипрда ҳам сезилгани айтилмоқда.

Портлаш тўлқини оқибатида шаҳар ҳудудида жойлашган биноларнинг ярмига зарар етган, кўплаб бинолар вайрон бўлган, ойналар ва эшиклар синган. 300 мингга яқин киши уйсиз қолган, портлашдан кўрилган зарар миқдори камида 3 миллиард АҚШ долларига тенг деб баҳоланмоқда.

Ливан ҳукумати Байрутдаги портда кузатилган ушбу ҳодисаларга олти йил аввал божхона хизмати томонидан мусодара қилинган ва омборда сақланган 2750 тонна аммиак селитраси сабаб бўлганини айтмоқда.

Ливандаги АҚШ элчихонаси берган маълумотларга кўра портлашлар оқибатида заҳарли моддалар атмосферага кўтарилган бўлиши мумкин.

Президент Шавкат Мирзиёев 5 август куни Байрут бандаргоҳидаги портлаш сабаб Ливан президентига ҳамдардлик билдирган. Байрутда вафот этганлар хотираси учун бутун Ливанда мотам эълон қилинган. Шаҳар губернатори Марвон Аббуд юз берган воқеани Иккинчи Жаҳон уруши вақтида Хиросима ва Нагасакида юз берган атом бомбаси портлашларига тенглаштирган.