«Роскосмос» Россия сунъий йўлдоши томонидан кучли портлаш юз берган Байрутдаги бандаргоҳнинг фазодан олган суратларини эълон қилди.
Сўнгги маълумотларга кўра кучли портлаш оқибатида 110 нафар киши ҳалок бўлган, 4 мингдан зиёд одам турли даражадаги тан жароҳатларини олган. Қидирув-қутқарув ишлари давом эттираётгани инобатга олинса ушбу рақамлар яна ўзгариши мумкин.
Байрут губернатори Марван Аббуд портлашнинг шаҳарнинг ярмига талафот етказганини билдирган, 300 нафардан зиёд аҳоли бошпанасиз қолган. Унинг сўзларига кўра портлаш туфайли шаҳарга етган зарар миқдори 3-5 миллиард долларни ташкил қилиши мумкин.
Ливан ҳукумати портлашга 2014 йилда россиялик тадбиркор Игор Грешечкинга тегишли Rhosus («Росус») кемасидан топилган ва мусодара қилинган 2750 тонна аммиак селитрасининг детонацияси сабаб бўлганини маълум қилган. Тахминларга кўра портлаш аммиак селитраси сақланган омбор ҳудудида чилангарлик-павандлаш ишлари вақтидаги эҳтиётсизлик оқибатида содир бўлган. Мусодара қилинган юк утилизация қилиниши лозим бўлган, аммо олти йил давомида бу иш амалга оширилмаган.
Президент Шавкат Мирзиёев 5 август куни Байрут бандаргоҳидаги портлаш сабаб Ливан президентига ҳамдардлик билдирган. Байрутда вафот этганлар хотираси учун бутун Ливанда мотам эълон қилинган. Шаҳар губернатори Марвон Аббуд юз берган воқеани Иккинчи Жаҳон уруши вақтида Хиросима ва Нагасакида юз берган атом бомбаси портлашларига тенглаштирган.
Аввал Ливан ҳукумати Байрутдаги портда аммиак селитрасини сақлашга алоқадор ходимларнинг айримлари тергов давомида уй қамоғига жойлаштирилганини маълум қилганди.
Изоҳ (0)