COVID-19 пандемияси дунёдаги таълимнинг энг катта узилишига олиб келди. Бу ҳақда Бирлашган Миллатлар Ташкилоти бош котиби Антониу Гутерриш маълум қилди.
Бош котибнинг сўзларига кўра, июль ойи ўрталарига келиб 160 дан ортиқ мамлакатда мактаблар ёпилди, бу эса 1 миллиарддан ортиқ ўқувчиларга таъсир кўрсатмоқда. Дунё бўйича камида 40 миллион бола жуда муҳим саналган мактабгача таълим олишдан мосуво бўлган.
Гуттеришнинг таъкидлашича, ота-оналар, айниқса, аёллар уйдаги яқинларига ғамхўрлик қилишнинг оғир юкини ўз зиммаларига олишга мажбур бўлган.
«Радио, телевидение ва интернетдаги дарсларга, шунингдек, ўқитувчилар ва ота-оналарнинг саъй-ҳаракатларига қарамай, кўплаб ўқувчилар ҳали ҳам бу борада қамраб олинмаган. Имконияти чекланган, озчилик ва ночор жамоалар, қочқинлар, шунингдек, чекка ҳудудларда яшовчи ўқувчилар керакли таълимни ололмаслик хавфи мавжуд.
Масофадан ўқиш имкониятига эга бўлганлар учун ҳам муваффақият уларнинг яшаш шароитларига, шу жумладан, уй вазифалари қанчалик тўғри тақсимланганига боғлиқ», — дейди Антониу Гутерриш.
БМТ бош котибининг маълум қилишича, дунё пандемиядан олдин ҳам таълим инқирозига дуч келган, турли мамлакатларда мактаб ёшидаги 250 миллиондан ортиқ бола мактабга бора олмаган ва ривожланаётган мамлакатларда ўқувчиларнинг атиги тўртдан бир қисми зарур базавий кўникмаларни эгаллаган.
Гутерриш ҳукуматлар томонидан бугун қабул қилинадиган қарорлар юз миллионлаб ёшларга ва мамлакатларнинг ўнлаб йиллар давомида ривожланиш истиқболларига таъсир қилиши ҳақида огоҳлантирди.
https://youtu.be/EwQnrxkySYU
Вазиятни тўғрилаш учун БМТ раҳбари халқаро шериклар билан биргаликда «Келажагимизни қутқаринг» шиори остида кампания бошлаганини эълон қилди. У мамлакатлар расмийларини тўртта муҳим йўналиш бўйича ҳаракат қилишга чақирди.
Биринчидан, БМТ раҳбарининг сўзларига кўра, давлатлар мактабларни қайта очиши керак, касаллик тарқалиши назорат остида бўлгандан сўнг ўқувчиларни энг хавфсиз шароитда мактаб ва ўқув муассасаларига қайтариш керак.
Иккинчидан, молиявий оқимларни тақсимлашда таълимга устувор аҳамият бериш керак. Инқироздан олдин ҳам паст ва ўрта даромадли мамлакатларда таълимни молиялаштиришдаги камчилик йилига 1,5 триллион АҚШ долларига тенг бўлган. Бош котибнинг фикрича, таълим бюджети ҳимояланиши ва оширилиши лозим.
Учинчидан, маърифий ташаббуслар бошқалардан ортда қолиб кетиш хавфи юқори бўлганларга – фавқулодда ва инқирозли вазиятларда яшовчи, озчилик гуруҳларининг вакиллари, бошқа мамлакатларга кўчганлар ва ногиронларга йўналтирилиши керак.
Тўртинчидан, рақамли саводхонлик ва инфратузилишга сармоялар, билим олишни ўрганишда эволюция, узлуксиз таълим концепциясини модернизация қилиш ва расмий ҳамда норасмий таълим ўртасидаги мустаҳкам алоқалар ўрнатиш лозим.
«Таълим келажаги хавф остида. Биз дунё бўйлаб болалар ва ёшлар келажагининг бурилиш нуқтасида яшаяпмиз», – деди Антониу Гутерриш.
Изоҳ (0)