Бош вазир ўринбосари Ўктам Барноев, вазир Жамшид Хўжаев, унинг биринчи ўринбосари Шуҳрат Тешаев ва Sulton Tex Group ўртасидаги можарони кўриб чиқаётган Қибрай туман маъмурий судининг навбатдаги мажлисида депутат Расул Кушербаев ҳам кузатувчи сифатида иштирок этди. Бу ҳақда «Дарё»га Sulton Tex Group раҳбари Нурбек Эргашев хабар берди.
Таъкидланишича, навбатдаги суд мажлиси 4 август куни бўлиб ўтган. Судда жавобгар томон вакилларининг барчаси иштирок этган.
«Кластерлик фаолиятимизни тўхтатиш учун асос қилиб кўрсатилган тўртта камчилигимизни асослаб беришолмагани боис, эндиликда фермерлар манфаати бузилган деган гапни такрорлашмоқда. Ҳолбуки, Қарши туманидаги аксарият фермерлар биз билан ишлашдан умидвор эканлигини айтишган. Қолаверса, кластерлик фаолиятимизнинг тўхтатилишига дастлаб 16 кишидан иборат ишчи гуруҳ таъкидлаган ‘тўртта камчилик’ асос қилиб олинган. Эндиликда шу камчиликларимизни асослаб беришолмаяпти», — дейди Нурбек Эргашев.
Мавзуга доир:
- «Ҳокимият ва кластер судлашиш билан овора. Жабрини тортаётган эса биз». Қашқадарёлик фермерлар пахта парваришидаги агротехник тадбирлар кечикаётганидан шикоят қилди
- Қарши тумани ҳокими ўринбосари судда кластер фаолияти тўхтатилишини кластер раҳбарининг селекторда қатнашмаслиги, ҳоким телефонига жавоб бермаслиги билан изоҳлади
«Судда Олий Мажлис депутати Расул Кушербаевнинг иштирок этиши адолатнинг қарор топишида катта аҳамият касб этади деган умиддамиз. Ва суднинг адолатидан умидвормиз», — дейди Нурбек Эргашев.
Қибрай туман маъмурий суди 2020 йил 6 августга қадар танаффус эълон қилган.
Эслатиб ўтамиз, Sulton Tex Group ва Қарши туман ҳокимлиги ўртасидаги можароли ишни кўриб чиққан Қарши туман маъмурий суди 2020 йил 8 июнь куни туман ҳокимлиги мансабдорларининг кооперация деб аталаётган МЧЖ билан фермерлар ўртасида шартнома тузишга эришиш мақсадида амалга оширган барча ҳаракатлари ноқонуний деб топганди. Шунингдек, давлат рўйхатидан ўтишда МЧЖ номига кооперация сўзини қўшиб рўйхатдан ўтган ва фермерларни шартнома тузишга мажбурлаган МЧЖ гувоҳомасини бекор қилди.
Айтиб, айтган гапидан қайтадиган Қашқадарё вилоят маъмурий суди эса Қарши туман маъмурий судининг 2020 йил 8 июндаги кооперация аталмиш МЧЖ гувоҳномасини бекор қилиш ҳақидаги қарорини рад этди. Кооперация сўзи бўлган МЧЖга фермерлар билан шартнома тузиб, ишлашда давом этишига рухсат берганди.
Шундан сўнг, Sulton Tex Group раҳбари Нурбек Эргашев қишлоқ хўжалиги вазири Жамшид Хўжаевга матбуот анжумани ташкил қилиб, юз бераётган англашилмовчиликлар ҳақида журналистлар олдида очиқчасига гаплашиб олишни таклиф қилди. Вазирлик эса ҳозирча бу таклифга жавоб бермади.
Изоҳ (0)