Ўзбекистон молия вазири ўринбосари: «Пенсия ва нафақаларнинг 10 фоизга оширилиши инфляцияга боғлиқ эмас»

Ўзбекистонда 1 сентябрдан ёшга доир пенсиялар ва нафақалар миқдорининг оширилиши инфляция кўрсаткичларига боғлиқ эмас. Бу ҳақда молия вазири ўринбосари Жамшид Абруевга таяниб, «Gazeta.uz» хабар берди.

Аввалроқ Президенти фармони билан 2020 йил 1 сентябрдан бошлаб ёшга доир пенсиялар, болаликдан ногиронлиги бўлган шахсларга, зарур иш стажига эга бўлмаган кекса ёшдаги ва меҳнатга лаёқатсиз фуқароларга бериладиган нафақалар миқдори 10 фоизга оширилиши тўғрисида хабар берилганди.

Бундан ташқари, 14 ёшгача болалари бор оилалар учун нафақа олувчилар сонини икки бараварга (345 мингдан 700 минггача), 2 ёшгача бўлган болага қаровчилар учун нафақа олувчиларни 20 фоизга (333 мингдан 400 минггача) ҳамда моддий ёрдам олувчилар (89 мингдан 100 минггача) сонини 13 фоизга ошириш кўзда тутилган.

Мазкур қарор 3,7 миллион аҳолига тааллуқли. Шу билан бирга, Молия вазирлиги ҳузуридаги бюджетдан ташқари Пенсия жамғармаси харажатлари 1 триллион сўмга ошади.

Жамшид Абруевнинг таъкидлашича, пенсия ва нафақалар миқдорининг оширилиши, январь—июль ойида 4,3 фоизни ташкил этган инфляция кўрсаткичларига боғлиқ эмас.

«Ўтган етти ой давомидаги инфляция кўрсаткичлари паст, дастлабки маълумотларга кўра, 4,3 фоизни ташкил этмоқда. Пенсия ва нафақа миқдорининг 10 фоизга оширилиши, пандемия вақтида озиқ-овқат, дори-дармон ёки бошқа хизматларга бўлган эҳтиёжини қўллаб-қувватлашга қаратилган. Буларнинг барчаси мавжуд имкониятларга асосланган — 2020 йилда ушбу тадбир учун бюджет харажатлари қўшимча равишда 1 триллион 40 миллиард сўмни ташкил этади», — дейди молия вазири ўринбосари.

Жамшид Абруевнинг таъкидлашича, базавий ҳисоблаш миқдори 2019 йил 1 августда белгиландан қиймат бўйича ўзгаришсиз қолади — 223 минг сўм.