Қашқадарё вилоятида коронавирусга чалинган беморлар эндиликда уй шароитида эмас, стационар шароитда даволанади. Бу ҳақда вилоят ҳокими Зоир Мирзаев маълум қилди.
«Бундан кейин касаллик аниқланган фуқаролар уйда эмас, тўлиқ стационар шароитда даволанади — деди вилоят ҳокими Зоир Мирзаев. — Ўрганишлар шуни кўрсатаяптики, уйда даволанишдан кўра стационар шароитда даволаниш анча ишончли ва самарали. Қолаверса, вилоятда яратилган захира ўринларидан ташқари шифохоналарда коронавирусни даволаш учун ажратилган ўринлар сони ҳам, дори-дармон захираси ҳам етарли».
Таъкидланишича, вилоятда эндиликда ҳар бир тиббиёт муассасасида энг камида биттадан мобил гуруҳ ташкил қилинади ва мазкур мобил гуруҳлар уй шароитида даволанаётган беморлар, касалликка шубҳа қилинганлар ҳолидан хабардор бўлиб туради.
Маҳалла раиси ва профилактика инспектори эса айни кунгача коронавирусга чалиниб, уйида даволанаётганлар рўйхатини шакллантиради. Ҳамда бемор даволанаётган ҳудудда карантин ва изоляция қоидаларига қай даражада амал қилинаётганини назорат қилади.
Зоир Мирзаев вилоятда карантин чоралари юмшатилиши ортидан сектор раҳбарлари ва мутасаддиларга бу ҳақда зарур топшириқлар берган. Сектор раҳбарлари буларнинг барчасини чуқур ўрганиб, таҳлил қилиб бориши ва шунга кўра иш тутиши шартлигини қўшимча қилган.
Изоҳ (0)