«Туркманистон темир йўллари» компанияси мамлакатдаги поездлар ҳаракатига қўйилган чекловларни 15 августгача узайтирди. Бу ҳақда «Хроника Туркменистана» хабар берди.
Аввалроқ Туркманистондаги поездлар қатнови 16 июлдан 23 июлгача тўхтатилганди. Кейинроқ поездлар ҳаракатига қўйилган чеклов 1 августгача узайтирилган.
Шунингдек, Туркманистон ҳудудлари ўртасидаги автобус қатновлари 27 июлдан бошлаб тўхтатилган. Мамлакатдаги барча санаторийлар номаълум муддатгача ёпилган.
Ҳозирги пайтда мамлакат вилоятлари орасида самолётлар қатнамоқда. Бироқ рейсларга чипталарни уларнинг расмий нархидан уч баравар юқори нархда сотиб олиш мумкин.
Аввалроқ Туркманистонда барча масжидлар ёпилганди, мамлакат фуқаролари ичак инфекциясининг олдини олиш учун ниқоб тақишга чақирилганди.
Эслатиб ўтамиз, Туркманистонда коронавирус расман қайд этилмаган. Мамлакатда 6 июлдан 15 июлгача Жаҳон соғлиқни сақлаш ташкилоти миссияси текширув ўтказди. Ташриф якунларига бағишланган брифингда миссия раҳбари Кэтрин Смолвуд мамлакат Соғлиқни сақлаш вазирлигига таянган ҳолда Туркманистонда COVID-19 инфекциясига чалиниш ҳолати борлигини тасдиқламаган.
Изоҳ (0)