Беларусда президентликка номзод аёлни қўллаб-қувватлаш мақсадида сўнгги 10 йил ичидаги энг йирик митинг ўтказилди (видео)

Минскда Беларусь президентлигига номзод Светлана Тихановскаяни қўллаб-қувватлаш мақсадида ўтказилган митингда 63 мингга яқин одам иштирок этди, деб хабар беради «Весна».

Маълум қилинишича, митинг концерт шаклида ўтказилган бўлиб, Тошкент вақти билан соат 00:00 да якунланган. Тихановскаядан ташқари саҳнада бирлашган штаб аъзолари, рўйхатдан ўтмаган номзодларнинг вакиллари — Мария Колесникова ва Вероника Сепкало чиқиш қилган.

Таъкидланишича, замонавий Беларусь тарихида бу каби оммавий акция сўнгги 10 йилда биринчи бор ўтказилмоқда. Қуйида митинг қандай ўтгани тасвирланган кадрларни кўриш мумкин.

https://www.instagram.com/p/CDRZ1bBpAzY/?utm_source=ig_embed

Уже более 20 тысяч человек В Минске #минск pic.twitter.com/pW9xZjExxE

— Алексей Кириленко (@Kirilenko_a) July 30, 2020

Аввалроқ Беларусда президентлик сайловлари олдидан амалга оширилаётган кампания вақтида 700 нафардан зиёд одам ҳибсга олингани, уларнинг ҳар бештадан биттаси маъмурий қамоққа тушгани хабар қилинганди.

Эслатиб ўтамиз, 9 августда Беларусда навбатдаги президентлик сайловлари бўлиб ўтади. Сайловларда 1994 йилдан бери давлатни бошқариб келаётган Александр Лукашенко ҳам иштирок этмоқда. Сайловолди тарғибот тадбирлари вақтида норозилик намойишлари бўлиб ўтмоқда, ундан аввал президентликка номзодини қўймоқчи бўлганларнинг аксар қисми, хусусан, асосий рақобатчи Виктор Бабарико ҳибсга олинган. Светлана Тихановская сайловларга қадар етиб келган номзодлар орасида Лукашенкога энг жиддий рақиб ҳисобланади.