“Turkmaniston temiryo‘llari” kompaniyasi mamlakatdagi poyezdlar harakatiga qo‘yilgan cheklovlarni 15-avgustgacha uzaytirdi. Bu haqda “Xronika Turkmenistana” xabar berdi.
Avvalroq Turkmanistondagi poyezdlar qatnovi 16-iyuldan 23-iyulgacha to‘xtatilgandi. Keyinroq poyezdlar harakatiga qo‘yilgan cheklov 1-avgustgacha uzaytirilgan.
Shuningdek, Turkmaniston hududlari o‘rtasidagi avtobus qatnovlari 27-iyuldan boshlab to‘xtatilgan. Mamlakatdagi barcha sanatoriylar noma’lum muddatgacha yopilgan.
Hozirgi paytda mamlakat viloyatlari orasida samolyotlar qatnamoqda. Biroq reyslarga chiptalarni ularning rasmiy narxidan uch baravar yuqori narxda sotib olish mumkin.
Avvalroq Turkmanistonda barcha masjidlar yopilgandi, mamlakat fuqarolari ichak infeksiyasining oldini olish uchun niqob taqishga chaqirilgandi.
Eslatib o‘tamiz, Turkmanistonda koronavirus rasman qayd etilmagan. Mamlakatda 6-iyuldan 15-iyulgacha Jahon sog‘liqni saqlash tashkiloti missiyasi tekshiruv o‘tkazdi. Tashrif yakunlariga bag‘ishlangan brifingda missiya rahbari Ketrin Smolvud mamlakat Sog‘liqni saqlash vazirligiga tayangan holda Turkmanistonda COVID-19 infeksiyasiga chalinish holati borligini tasdiqlamagan.
Izoh (0)