Буюк Британия ҳукумати коронавирус инфекциясининг тарқалиши туфайли бирлашган қиролликда жорий қилинган чеклов чораларини юмшатиш бўйича чоралар кўрмоқчи эмас. Reuters агентлигининг қайд этишича, ушбу қарор сўнгги кунларда COVID-19 билан касалланиш ҳолатлари сонининг кўпайгани билан боғлиқ.
«Хавотирли огоҳлантириш сигналлари янграмоқда. Биз ҳозир бу борада шошилмаслик ва вируснинг тарқалиши назоратга олингунича кутишга қарор қилдик», — деган Буюк Британия бош вазири Борис Жонсон.
Аввал август ойида қиролликда муз саройлари ва казинолар очилиши, шунингдек, айрим тадбирлар, жумладан, ёпиқ иншоотларда тўй маросимларини ўтказишга рухсат бериш режалаштирилаётгани айтилганди.
Жонс Ҳопкинс университети тақдим этган статистика бўйича Буюк Британияда 31 июль ҳолатига кўра COVID-19 пандемияси даврида 300 минг нафардан зиёд кишида коронавирус инфекцияси қайд этилган, 46 минг нафар одам касаллик асоратлари оқибатида вафот этган.
Буюк Британияда март охиридан май ўрталарига қадар қатъий карантин тартиби амалда бўлган, жумладан, ресторанлар, барлар, дўконлар ишламаган, ходимлар масофадан ишлаш тартибига ўтказилган, кўчада икки кишидан кўп одамнинг тўпланиши тақиқланганди, бир оилада яшовчилар бундан мустасно, деб белгиланганди.
30 июль куни Буюк Британиянинг 1 августдан бошлаб Россия билан авиақатновларни тиклаётган уч мамлакатдан бири экани ҳақида хабар берилганди. Россиядан қиролликка келганлар 14 кун давомида қатъий карантин режимида бўлишига тўғри келади.
Изоҳ (0)