Ўзбекистонда коронавирусдан тузалган беморлар қандай қоидаларга амал қилиши лозимлиги айтилди

Коронавирусга қарши штаб аъзоси Севара Убайдуллаева коронавирусдан тузалган беморлар қандай қоидаларга амал қилиши лозимлигини айтиб ўтди.

Коронавирусдан тузалганидан сўнг касалхонадан чиққан беморлар, айниқса кексалар организмдаги кузатилган ўзгаришларни тиклаш учун маълум вақт оилавий ёки умумий амалиёт шифокорида диспансер назоратида туриши керак. Улар беморларни назоратда тутган ҳолда ўпканинг жароҳатланган фоизидан келиб чиқиб, нафас машқларини тавсия қилади. Шу билан бирга, сурункали касаллиги мавжуд беморларда организмнинг меъёрий фаолиятини тиклаш мақсадида доимий диспансер назоратида тутиш, йилда 2 марта даволаш чоралари олиб борилади.

Пневмония, оғир ва ўта оғир даражадан тузалган беморлар организмидаги оғир кечирилган жараёнларни инобатга олган ҳолда 1 ойдан 3 ойгача, зарур бўлганда 6 ойгача тикланиш жараёнини олиб бориши талаб этилади. Улар доимий тарзда шифокор билан алоқада бўлиши шарт.

«Касаллик оғирроқ кечган беморлар махсус реабилитацияга муҳтож бўлиб, уларда нафас тикланиши, яъни сатурация (ҳужайраларни кислород билан таъминланиш кўрсаткичини имкон қадар кўтариш учун) шифокор назоратида санатор-курорт ёки физиотерапевтик даволарни олишлари керак бўлади. Шу билан бирга, гигиена қоидаларига риоя қилиш, яъни тез-тез қўлларни 20 сония давомида совунлаб ювиш, томоқни тез-тез чайиш, кўп суюқликлар ичиш, соғлом овқатланиш ва енгил жисмоний фаолликни олиб бориш билан учраши мумкин бўлган турли бошқа юқумли ва паразитар касалликлар профилактикасини олиб борган бўлади», — дейди мутахассис.

Эслатиб ўтамиз, аввалроқ Санитария-эпидемиология назорати давлат инспекцияси бош инспектори Нурмат Отабеков коронавирус асоратлари ҳақида маълумот берган. Унга кўра, инфекциянинг оғир шакли билан касалланган беморларда тромбоэмболия, тромбоз, ўпка артерияси тромбоэмболияси ёки ўткир коронар етишмовчилик каби ўзгаришлар натижасида баъзи беморларда ўпка ҳаётий сиғимининг 20-30 фоизга камайиши, алвеолалар деворларида бириктирувчи тўқиманинг юзага келиши туфайли касалликдан сўнг ўпка фибрози кузатилиши мумкинлиги, бу эса ҳансираш, сурункали кислород етишмовчилигига олиб келишини айтган. Бундан ташқари юрак-қон томир тизимида, буйракларда ва асаб тизимида ҳам патологик ўзгаришлар юзага келиши мумкин.