O‘zbekistonda koronavirusdan tuzalgan bemorlar qanday qoidalarga amal qilishi lozimligi aytildi

Koronavirusga qarshi shtab a’zosi Sevara Ubaydullayeva koronavirusdan tuzalgan bemorlar qanday qoidalarga amal qilishi lozimligini aytib o‘tdi.

Koronavirusdan tuzalganidan so‘ng kasalxonadan chiqqan bemorlar, ayniqsa keksalar organizmdagi kuzatilgan o‘zgarishlarni tiklash uchun ma’lum vaqt oilaviy yoki umumiy amaliyot shifokorida dispanser nazoratida turishi kerak. Ular bemorlarni nazoratda tutgan holda o‘pkaning jarohatlangan foizidan kelib chiqib, nafas mashqlarini tavsiya qiladi. Shu bilan birga, surunkali kasalligi mavjud bemorlarda organizmning me’yoriy faoliyatini tiklash maqsadida doimiy dispanser nazoratida tutish, yilda 2 marta davolash choralari olib boriladi.

Pnevmoniya, og‘ir va o‘ta og‘ir darajadan tuzalgan bemorlar organizmidagi og‘ir kechirilgan jarayonlarni inobatga olgan holda 1 oydan 3 oygacha, zarur bo‘lganda 6 oygacha tiklanish jarayonini olib borishi talab etiladi. Ular doimiy tarzda shifokor bilan aloqada bo‘lishi shart.

“Kasallik og‘irroq kechgan bemorlar maxsus reabilitatsiyaga muhtoj bo‘lib, ularda nafas tiklanishi, ya’ni saturatsiya (hujayralarni kislorod bilan ta’minlanish ko‘rsatkichini imkon qadar ko‘tarish uchun) shifokor nazoratida sanator-kurort yoki fizioterapevtik davolarni olishlari kerak bo‘ladi. Shu bilan birga, gigiyena qoidalariga rioya qilish, ya’ni tez-tez qo‘llarni 20 soniya davomida sovunlab yuvish, tomoqni tez-tez chayish, ko‘p suyuqliklar ichish, sog‘lom ovqatlanish va yengil jismoniy faollikni olib borish bilan uchrashi mumkin bo‘lgan turli boshqa yuqumli va parazitar kasalliklar profilaktikasini olib borgan bo‘ladi”, — deydi mutaxassis.

Eslatib o‘tamiz, avvalroq Sanitariya-epidemiologiya nazorati davlat inspeksiyasi bosh inspektori Nurmat Otabekov koronavirus asoratlari haqida ma’lumot bergan. Unga ko‘ra, infeksiyaning og‘ir shakli bilan kasallangan bemorlarda tromboemboliya, tromboz, o‘pka arteriyasi tromboemboliyasi yoki o‘tkir koronar yetishmovchilik kabi o‘zgarishlar natijasida ba’zi bemorlarda o‘pka hayotiy sig‘imining 20-30 foizga kamayishi, alveolalar devorlarida biriktiruvchi to‘qimaning yuzaga kelishi tufayli kasallikdan so‘ng o‘pka fibrozi kuzatilishi mumkinligi, bu esa hansirash, surunkali kislorod yetishmovchiligiga olib kelishini aytgan. Bundan tashqari yurak-qon tomir tizimida, buyraklarda va asab tizimida ham patologik o‘zgarishlar yuzaga kelishi mumkin.