Ўзбекистонда Санитария-эпидемиология хизматини молиялаштиришга қарийб 200 млн доллар йўналтирилади

Янги ташкил этилган Санитария-эпидемиология хизматининг моддий-техник базасини мустаҳкамлаш учун халқаро молия институтларининг 194 миллион доллар миқдоридаги маблағлари йўналтирилади. Бу ҳақда Ўзбекистон Президентининг 25 июлдаги «Коронавирус пандемиясини юмшатиш, аҳолининг санитария-эпидемиологик осойишталиги ва саломатлигини сақлаш тизимини тубдан такомиллаштириш чора-тадбирлари тўғрисида»ги фармонида сўз боради.

Аввалроқ ушбу фармонга кўра, Соғлиқни сақлаш вазирлиги ҳузуридаги Санитария-эпидемиологик осойишталик агентлиги ҳамда Вазирлар Маҳкамаси ҳузуридаги Санитария-эпидемиология назорати давлат инспекцияси ва уларнинг ҳудудий бўлинмалари тугатилган, мазкур икки тузилма ўрнига Санитария-эпидемиологик осойишталик ва жамоат саломатлиги хизмати, унинг ҳудудий бошқармалари ва туман (шаҳар) бўлимлари ташкил этилгани тўғрисида хабар берилганди.

Ҳужжатга кўра, хизмат ўз тузилмаси таркибига кирувчи ташкилотлар билан ягона тизим ҳосил қилади ва унинг қошида бюджетдан ташқари махсус жамғарма ташкил этилади. Санитария-эпидемиологик осойишталик агентлиги ва Санитария-эпидемиология назорати давлат инспекциясининг бюджетдан ташқари барча қолдиқ маблағлари янги ташкил этилган жамғармага ўтказилади.

Жамғарманинг молиялаштириш манбалари қуйидагилар:

• санитария-эпидемиология қонунчилигини бузганлик учун қўлланилган жарималар ва жарималарни тўлаш кечиктирилганлиги учун ҳисобланган пенялардан тушган маблағларнинг 50 фоизи (назорат тадбирлари бошқа давлат органлари билан биргаликда амалга оширилганда, жарима ҳамда жарималарни тўлаш кечиктирилганлиги учун ҳисобланган пенялардан тушган маблағларнинг 25 фоизи);
• идоравий мансуб ташкилотлар томонидан жисмоний ва юридик шахсларга ихтисослашган пуллик хизматлар кўрсатишдан тушган тушумларнинг уларни амалга оширишга кетган жами харажатлар қоплангандан кейин қолган суммасининг 15 фоизи;
• Жамғарманинг вақтинча бўш маблағларини тижорат банкларининг депозитларига жойлаштиришдан олинган даромадлар;
• қонун ҳужжатларида тақиқланмаган бошқа манбалар.

Санитария-эпидемиология хизматининг моддий-техник базасини мустаҳкамлашни молиялаштириш учун (қурилиш, реконструкция ва капитал таъмирлаш, юқори технологияли ускуналар, жиҳозлар, инвентаризация, махсус жиҳозлар билан таъминлаш учун) давлат бюджетидан 1,7 миллиард сўм (165 минг доллардан ортиқ) ҳамда Жаҳон банки, Осиё тараққиёт банки ва Осиё инфратузилма инвестициялари банки маблағларидан 194,5 миллион доллар ажратилади.

Санитария-эпидемиология хизмати марказий аппарати ходимларига бюджетдан ташқари маблағлари ҳисобидан қуйидаги миқдорларда узоқ муддатли узлуксиз хизмати учун ойлик устама тўланади (рағбатлантириш коэффициентини ҳисобга олган ҳолда лавозим маошига нисбатан коэффициентларда):

• 3 дан 5 йилгача — 0,5;
• 5 дан 10 йилгача — 0,8;
• 10 дан 15 йилгача — 1,0;
• 15 дан 20 йилгача — 1,5;
• 20 йилдан ортиқ — 1,8.

Узоқ муддатли узлуксиз хизмати учун ойлик устама олиш ҳуқуқини берувчи иш стажи Санитария-эпидемиология хизмати томонидан тасдиқланадиган тартибга мувофиқ ҳисоблаб чиқилади.