O‘zbekistonda Sanitariya-epidemiologiya xizmatini moliyalashtirishga qariyb 200 mln dollar yo‘naltiriladi

Yangi tashkil etilgan Sanitariya-epidemiologiya xizmatining moddiy-texnik bazasini mustahkamlash uchun xalqaro moliya institutlarining 194 million dollar miqdoridagi mablag‘lari yo‘naltiriladi. Bu haqda O‘zbekiston Prezidentining 25-iyuldagi “Koronavirus pandemiyasini yumshatish, aholining sanitariya-epidemiologik osoyishtaligi va salomatligini saqlash tizimini tubdan takomillashtirish chora-tadbirlari to‘g‘risida”gi farmonida so‘z boradi.

Avvalroq ushbu farmonga ko‘ra, Sog‘liqni saqlash vazirligi huzuridagi Sanitariya-epidemiologik osoyishtalik agentligi hamda Vazirlar Mahkamasi huzuridagi Sanitariya-epidemiologiya nazorati davlat inspeksiyasi va ularning hududiy bo‘linmalari tugatilgan, mazkur ikki tuzilma o‘rniga Sanitariya-epidemiologik osoyishtalik va jamoat salomatligi xizmati, uning hududiy boshqarmalari va tuman (shahar) bo‘limlari tashkil etilgani to‘g‘risida xabar berilgandi.

Hujjatga ko‘ra, xizmat o‘z tuzilmasi tarkibiga kiruvchi tashkilotlar bilan yagona tizim hosil qiladi va uning qoshida budjetdan tashqari maxsus jamg‘arma tashkil etiladi. Sanitariya-epidemiologik osoyishtalik agentligi va Sanitariya-epidemiologiya nazorati davlat inspeksiyasining budjetdan tashqari barcha qoldiq mablag‘lari yangi tashkil etilgan jamg‘armaga o‘tkaziladi.

Jamg‘armaning moliyalashtirish manbalari quyidagilar:

• sanitariya-epidemiologiya qonunchiligini buzganlik uchun qo‘llanilgan jarimalar va jarimalarni to‘lash kechiktirilganligi uchun hisoblangan penyalardan tushgan mablag‘larning 50 foizi (nazorat tadbirlari boshqa davlat organlari bilan birgalikda amalga oshirilganda, jarima hamda jarimalarni to‘lash kechiktirilganligi uchun hisoblangan penyalardan tushgan mablag‘larning 25 foizi);
• idoraviy mansub tashkilotlar tomonidan jismoniy va yuridik shaxslarga ixtisoslashgan pullik xizmatlar ko‘rsatishdan tushgan tushumlarning ularni amalga oshirishga ketgan jami xarajatlar qoplangandan keyin qolgan summasining 15 foizi;
• Jamg‘armaning vaqtincha bo‘sh mablag‘larini tijorat banklarining depozitlariga joylashtirishdan olingan daromadlar;
• qonun hujjatlarida taqiqlanmagan boshqa manbalar.

Sanitariya-epidemiologiya xizmatining moddiy-texnik bazasini mustahkamlashni moliyalashtirish uchun (qurilish, rekonstruktsiya va kapital ta’mirlash, yuqori texnologiyali uskunalar, jihozlar, inventarizatsiya, maxsus jihozlar bilan ta’minlash uchun) davlat budjetidan 1,7 milliard so‘m (165 ming dollardan ortiq) hamda Jahon banki, Osiyo taraqqiyot banki va Osiyo infratuzilma investitsiyalari banki mablag‘laridan 194,5 million dollar ajratiladi.

Sanitariya-epidemiologiya xizmati markaziy apparati xodimlariga budjetdan tashqari mablag‘lari hisobidan quyidagi miqdorlarda uzoq muddatli uzluksiz xizmati uchun oylik ustama to‘lanadi (rag‘batlantirish koeffitsiyentini hisobga olgan holda lavozim maoshiga nisbatan koeffitsiyentlarda):

• 3 dan 5 yilgacha — 0,5;
• 5 dan 10 yilgacha — 0,8;
• 10 dan 15 yilgacha — 1,0;
• 15 dan 20 yilgacha — 1,5;
• 20 yildan ortiq — 1,8.

Uzoq muddatli uzluksiz xizmati uchun oylik ustama olish huquqini beruvchi ish staji Sanitariya-epidemiologiya xizmati tomonidan tasdiqlanadigan tartibga muvofiq hisoblab chiqiladi.