Ижтимоий тармоқларда солиқ органлари ҳисобот муддатлари ва бошқа меъёрларни бузган тадбиркорларни «кунлик жарималар режаси»дан келиб чиққан ҳолда жаримага тортишни кўпайтиргани тўғрисида хабарлар тарқалди. Давлат солиқ қўмитаси матбуот хизмати «жарималар режаси» тўғрисидаги хабарлар ҳақиқатга тўғри келмаслигини маълум қилди.
«Маъмурий чоралар ҳисобот тақдим этиш ва қонун ҳужжатларида белгиланган солиқларни тўлаш муддатларини бузган солиқ тўловчиларга нисбатан қўлланилади», — дейилади хабарда.
ДСҚ маълумотларига кўра, Солиқ кодексининг 111-моддасига биноан бугунги кунда қўмита май ойи учун ҚҚС солиқ декларациясини тақдим этмаган 3375 та хўжалик юритувчи субъектларнинг банк ҳисобварақлари бўйича операцияларни тўхтатган.
Таъкидланишича, 20 июнь дам олиш кунига (шанба) тўғри келгани сабаб, солиқ мажбуриятларини бажаришнинг сўнгги муддати — солиқ ҳисоботини топшириш ва май ойида бюджетга ҚҚС тўлаш — 22 июнга (душанба) қолдирилган.
«Шунга қарамай, 3000 дан ортиқ фаолият юритаётган тадбиркорлик субъектлари солиқ ҳисоботларини тақдим этиш ва Солиқ кодексининг 273-моддасида белгиланган солиқни тўлаш тартибини бузган ҳолда солиқ мажбуриятларини бажармаган», — дейилади хабарда.
ДСҚнинг таъкидлашича, солиқ ҳисоботларини ўз вақтида тақдим этилмаганлиги тўғрисида билдиришномалар солиқ тўловчиларнинг шахсий кабинетларига юборилган, шунингдек, юқорида келтирилган сабабларни кўрсатган ҳолда уларнинг банкдаги ҳисобварақлари бўйича операциялар тўхтатилиши мумкинлиги тўғрисида огоҳлантириш юборилган.
Май ойи бўйича ҚҚС ва бошқа бир қатор солиқларни тўлаш бўйича солиқ декларациясини топширишнинг барча муддатлари тугаганлигини ҳисобга олган ҳолда, Давлат солиқ қўмитаси солиқ тўловчиларнинг мажбуриятларини эслатиб ўтган.
«Солиқ ҳисоботлари фақатгина Солиқ кодексига кўра солиқ тўловчи деб эътироф этилган солиқлар бўйича белгиланган муддатларда тақдим этилиши керак», — дейилади қўмита матбуот хизмати хабарида.
Маъмурий жавобгарлик тўғрисидаги кодекснинг 175-моддаси 1-қисмига биноан фойда (даромад) ёки солиқ солинадиган бошқа объектларнинг ҳисобини олиб бормаслик ёхуд бундай ҳисобни белгиланган тартибни бузган ҳолда олиб бориш, бошқа мажбурий тўловларни ҳисоблаб чиқариш ва тўлаш учун зарур бўлган солиқ ҳисоботларини, ҳисоб-китобларини ҳамда бошқа ҳужжатларни, ўз вақтида тақдим этмаслик ёки белгиланган муддатда тақдим этмаслик базавий ҳисоблаш миқдорининг бир бараваридан уч бараваригача миқдорда жарима солишга сабаб бўлади.
Аввалроқ ижтимоий тармоқларда Олмазор тумани ички ишлар органлари фаолиятини мувофиқлаштириш бошқармасида бўлиб ўтган мажлисдан ёзиб олингани тахмин қилинган овозли хабар тарқалгани ва овознинг Олмазор тумани ИИО ФМБ Ҳуқуқбузарликлар профилактикаси бошқармаси махсус топшириқлар бўйича инспектори подполковник Фаррух Холовга тегишли экани ҳақида хабар берилганди. Холов ўз бўйсунувчиларига «план»ни тўлдириш учун ҳар куни 5 тадан маъмурий баённома тузишга топшириқ берган.
Ички ишлар вазирлиги матбуот котиби Шоҳрух Ғиёсов эса мажбурий «план» иш услубидан буткул воз кечилганини маълум қилган.
Изоҳ (0)