Италия парламентининг қуйи палатаси мамлакат бош вазири Жузеппе Контенинг мамлакатда фавқулодда ҳолат режимини 15 октябргача узайтириш ҳақидаги ташаббусини қўллаб-қувватлади, дея хабар берди «РБК».
Италияда фавқулодда ҳолат 31 июль куни тугаши керак эди. Бош вазир Контенинг айтишича, фавқулодда ҳолат режимининг узайтирилиши қонун билан белгиланади ва керак бўлганда қўлланилиши мумкин.
Фавқулодда ҳолат режими бош вазирга ўзгарувчан эпидемиологик вазиятга жавобан фавқулодда қарорлар орқали шошилинч қоидаларни тезкор равишда киритиш, ўзгартириш ва бекор қилишга имкон бериш мақсадида ишлаб чиқилган. Бунда бирон қарорни қабул қилишдаги узоқ давом этадиган парламент жараёнини четлаб ўтилади.
Шунингдек, режим минтақавий ҳокимиятларга вирус тарқалишининг олдини олишга қаратилган маҳаллий тартиб-қоидаларни жорий этишга имкон беради.
Италия коронавирус инфекциясининг тез тарқалишига дуч келган Европанинг биринчи мамлакати бўлиб, узоқ вақт давомида касалланганлар сони бўйича Европада етакчи ўринни эгаллаб келди.
Жонс Ҳопкинс университетининг 30 июлдаги маълумотларига кўра, Италияда 246 488 киши COVID-19 касаллиги билан касалланган, 35 123 киши вафот этган. Сўнгги вақтларда кунига 300 киши атрофида янги ҳолатлар аниқланмоқда.
Изоҳ (0)