Икки маротаба коронавирусга чалинган Украинанинг Тернопол вилоятида истиқомат қилувчи фуқаро учинчи бор COVID-19’ни юқтириб олди. Бу ҳақда вилоят соғлиқни сақлаш бошқармасининг Facebook’даги саҳифасида маълум қилинди.
«Учинчи маротаба касалликка чалинган бемор бор. Коронавирус инфекцияси билан касалланиб, сўнг соғайган инсон қайта касалланишдан ҳимояланмаганини тушунишимиз керак», — дейди Тернопол ССБ бошлиғи Владимир Богайчук.
Март ойларининг ўрталарида Украинада ҳукумати коронавирус пандемияси сабаб уч ҳафталик карантин эълон қилганди. Хусусан, мамлакатда 200 дан ортиқ одам иштирок этадиган оммавий тадбирлар бекор қилинганди. Спорт тадбирларини томошабинларсиз, халқаро ташкилотлар розилиги билан ўтказишга рухсат берилган. Шунингдек, уч ҳафтага таълим муассасалари ёпилган.
Июнь ўрталарига келиб эса Украина ҳукумати иккинчи тўлқин бошланганини маълум қилди. Мамлакат бош вазири Денис Шмигал фуқароларни Соғлиқни сақлаш вазирлиги тавсияларига риоя қилишга чақирган: ижтимоий масофаланишга риоя қилиш, ниқоб тақиш, дезинфекцияни унутмаслик. Бундан ташқари, ҳукумат карантин чекловларини 31 июлга қадар узайтирган.
30 июль ҳолатига кўра, Украинада коронавирус билан касалланганлар сони 69 078 кишини ташкил этмоқда. Ҳозирга қадар мамлакатда 38 523 нафар бемор соғайган, 1673 киши COVID-19 қурбонига айланган.
Изоҳ (0)