Italiya parlamentining quyi palatasi mamlakat bosh vaziri Juzeppe Kontening mamlakatda favqulodda holat rejimini 15-oktabrgacha uzaytirish haqidagi tashabbusini qo‘llab-quvvatladi, deya xabar berdi “RBK”.
Italiyada favqulodda holat 31-iyul kuni tugashi kerak edi. Bosh vazir Kontening aytishicha, favqulodda holat rejimining uzaytirilishi qonun bilan belgilanadi va kerak bo‘lganda qo‘llanilishi mumkin.
Favqulodda holat rejimi bosh vazirga o‘zgaruvchan epidemiologik vaziyatga javoban favqulodda qarorlar orqali shoshilinch qoidalarni tezkor ravishda kiritish, o‘zgartirish va bekor qilishga imkon berish maqsadida ishlab chiqilgan. Bunda biron qarorni qabul qilishdagi uzoq davom etadigan parlament jarayonini chetlab o‘tiladi.
Shuningdek, rejim mintaqaviy hokimiyatlarga virus tarqalishining oldini olishga qaratilgan mahalliy tartib-qoidalarni joriy etishga imkon beradi.
Italiya koronavirus infeksiyasining tez tarqalishiga duch kelgan Yevropaning birinchi mamlakati bo‘lib, uzoq vaqt davomida kasallanganlar soni bo‘yicha Yevropada yetakchi o‘rinni egallab keldi.
Jons Hopkins universitetining 30-iyuldagi ma’lumotlariga ko‘ra, Italiyada 246 488 kishi COVID-19 kasalligi bilan kasallangan, 35 123 kishi vafot etgan. So‘nggi vaqtlarda kuniga 300 kishi atrofida yangi holatlar aniqlanmoqda.
Izoh (0)