Associated Press (AP) агентлиги Россия разведкасининг икки собиқ ходими инглиз тилидаги сайтлар орқали ёлғон маълумот тарқатганини даъво қилмоқда. Бу ҳақда «РБК» хабар қилди.
Агентликнинг иддао қилишича, Россия разведка хизмати ходимлари яқинлашиб келаётган президент сайловлари арафасида АҚШ аудиториясига коронавирус ҳақида ёлғон хабарлар тарқатмоқда. AP’га бу ҳақда унинг АҚШ ҳукуматидаги икки манбаси хабар қилган.
Ёлғон хабарлар инглиз тилидаги 3 та сайтда келтириб ўтилгани айтилмоқда. Таъкидланишича, сайтларда май ойининг охири июль ойи бошлари орасида 150 та аҳолида ваҳима уйғотувчи мақола чоп этилган. Ҳаммаси коронавирус пандемиясига тааллуқли бўлиб, уларнинг баъзиларида Россия қўллаб-қувватланган бўлса, бошқасида АҚШ ёмон отлиқ қилинган.
Мавзуга доир: Буюк Британия, АҚШ ва Канада россиялик хакерларни COVID-19 вакцинаси ҳақидаги маълумотларни ўғирлашга уринганликда айблади
Шунингдек, агентлик манбалари Россияда рўйхатдан ўтган сайт ҳақида ҳам сўз очишган. Уларнинг айтишича бу сайтдан пандемия орқали ғарбга қарши кайфиятни тарғиб қилишда ва ёлғон маълумот тарқатишда фойдаланилган.
Юқорида тилга олинган сайт InfoRos.ru бўлиб, у ўзидан ташқари, Infobrics.org ва OneWоrld.press веб-сайтларини бошқаради, деб хабар беради AP. Агентлик манбаларига кўра, нашрлар кўпинча аксиламерика характерга эга ва маълумотларни унинг асл манбасини яшириш ҳамда маълумотнинг қонунийлигини ошириш учун бошқа сайтлар орқали фаол тарқатмоқда.
AP манбаларининг маълумотига кўра InfoRos.ru сайтининг икки менежери Денис Тюрин ва Александр Старунский илгари разведкада ишлаган.
Нашрнинг ёзишича, сайтлардаги сохта маълумотларнинг тарқалиши ва ноябрь ойида бўлиб ўтадиган президент сайловлари бевосита боғлиқ эмас. Аммо баъзи мақолалар Трампнинг рақиби демократ Жо Байденга туҳмат қилган.
Шундан сўнг, «РБК» нашри Россия Ташқи ишлар вазирлиги ахборот ва матбуот департаментига, Inforos.ru, Infobrics.org ва Onewоrld.press агентликларига журналистик сўров юборди.
InfoRos агентлиги ўзини Россиядаги сиёсий, иқтисодий, ижтимоий ва маданий ҳаётнинг кўплаб долзарб мавзулари ва бошқа қатор мавзуларни ёритадиган оммавий ахборот воситаси сифатида тарифлади.
Веб-сайтдаги маълумотларга кўра, агентлик асосчиси «IA ‘Inforos’» МЧЖ ҳисобланади. SPARK маълумотлар базасида унинг асосий эгаси Михаил Панин бўлиб, у компаниянинг 75 фоизига эгалик қилади. Андрей Иляшенко компаниянинг бош директори деб кўрсатилган.
Бундан ташқари, 2008 йилда Денис Тюрин Inforos’нинг 100 фоиз акциясига эгалик қилган ва шундан кейин унинг улуши 66 фоизга тушиб кетган. Энди у шериклар рўйхатида йўқ. InfoRos.ru’нинг 2016 йилда нашр этилган ёзувларидан бирида Тюрин, шунингдек, ахборот агентлиги бош директори сифатида рўйхатга олинган.
АҚШ бундан олдин расмий Москвани COVID-19 ҳақидаги ёлғон маълумот тарқатиш кампаниясини олиб боришда айблаган. Февраль ойида расмий Вашингтон Twitter, Facebook ва Instagram’даги Россиянинг сохта аккаунтлари ушбу вирус АҚШ томонидан ишлаб чиқилгани ва бу Марказий разведка бошқармасининг биологик қуроли эканлиги ҳақидаги маълумотларни тарқатганини маълум қилган.
Шу билан бирга, Европа Иттифоқи Россия ва Хитой пандемия ҳақида ёлғон маълумот тарқатадиган кампанияларда иштирок этаётганини маълум қилди. ЕИ маълумотларига кўра, бундай кампаниялар, жумладан Европа мамлакатларида ҳам ўтказилди.Россия бошқа мамлакатларнинг ишларига аралашишни бир неча бор рад этган. Ташқи ишлар вазирлиги сохта нарсалар тарқалиши ҳақидаги маълумотни «атайлаб бўрттириш» деб атади. Кремль Россиянинг дезинформация кампаниясида айбловларни асоссиз деб рад этди.
Мавзуга доир:
Изоҳ (0)