Россия Федерал хавфсизлик хизмати Химки шаҳрида бўлиб ўтган отишмада Москвадаги одамлар кўп тўпланадиган жойда уюштирилиши режалаштирилган терактнинг олдини олди ва уни режалаштирган Марказий Осиё фуқаросини йўқ қилди. Бу ҳақда «Интерфакс» хабар берди.
Маълум қилинишича, теракт махсус хизмат ходимлари ҳамда Ички ишлар вазирлиги ва Россия Тергов қўмитаси ходимлари ҳамкорлигида бартараф қилинган.
Қайд этилишича, махсус хизмат ва ҳуқуқни муҳофаза қилувчи идоралар ходимлари Химки шаҳридаги ташландиқ гаражлар ҳудудида шубҳали эркакни аниқлаган. Эркак уни қўлга олиш ва ҳужжатларини текшириш жараёнида куч тузилмаларига қарата автоматдан ўт очган.
Отишма вақтида жиноятчи йўқ қилинган. Ҳодиса жойини кўздан кечириш пайтида жиноятчининг ёнида «АК-74» автомати, учта ўқланган ўқдон, иккита «Ф-1» ва битта «РГД» гранатаси топилган.
Бундан ташқари, ФХХ жиноятчи томонидан ижарага олинган квартирадаги тинтув пайтида унинг Суриядаги халқаро террорчилар эмиссарлари билан боғлиқлиги ва одамларни оммавий ўққа тутишга тайёргарлик кўргани ҳақида қўшимча маълумот олинган.
Айни пайтда йўқ қилинган жиноятчининг Марказий Осиё давлатларидан бирининг фуқароси эканлиги аниқланди. Бундан ташқари, унинг акаси Москва вилоятида қўлга олинган, у танишлари орқали укасини халқаро террорчилик ташкилотига аъзо бўлиш учун Сурияга боришдан қайтариш учун бир неча кун давомида қидирган. Айни пайтда террорчининг эҳтимолий шерикларини қидириш ишлари олиб борилмоқда.
Маълум қилинишича, жиноий иш бўйича суд-баллистик экспертизалар тайинланган. Ушбу ҳолат бўйича ҳуқуқ-тартибот идоралари ходимининг ҳаётига тажовуз қилиш моддаси бўйича жиноий иш қўзғатилган.
Отиб ташланган жиноятчининг акаси маълум қилишича, укаси икки ҳафта олдин ғойиб бўлган ва у укасининг йўқолгани ҳақида Россия Ички ишлар вазирлигига дарҳол хабар берган.
«Мен унинг суриялик террорчилар билан алоқада бўлганидан шубҳалана бошладим. Икки ҳафта олдин у бедарак йўқолди. Мен дарҳол Россия Ички ишлар вазирлигига хабар бердим», — дея маълум қилган жиноятчининг акаси.
«Интерфакс»нинг аниқлашича, жиноятчининг ёнидан 19 ёшли Тожикистон фуқароси Одил Қаюмовнинг ҳужжатлари топилган.
Аввалроқ Россия Федерал хавфсизлик хизмати Москва, Новосибирск шаҳарларида ва Красноярск ўлкасида «Ўзбекистон ислом ҳаракати»нинг 22 нафар аъзосини қўлга олиб, терактнинг олдини олганди.
Изоҳ (0)